मुंबई : पारंपरिक ऊर्जा स्त्रोत हे मर्यादित असल्यामुळे अपारंपरिक ऊर्जा क्षेत्राला प्रोत्साहन पारंपरिक ऊर्जा स्त्रोतदेऊन अधिकाधिक ऊर्जा निर्मिती करण्याची शासनाची भूमिका आहे. सेल्को फाउंडेशनच्या सहकार्याने राज्यातील १८ जिल्ह्यातील प्राथमिक आरोग्य केंद्रांचे सौरऊर्जीकरण करण्यात येणार आहे. सध्या ८ जिल्ह्यांतील प्राथमिक आरोग्य केंद्राचे सौरऊर्जीकरण पूर्णत्वास आले आहे तर १० जिल्ह्यांत सौरऊर्जीकरण प्रकल्प कार्यान्वित करण्यात येणार आहेत. यामुळे प्राथमिक आरोग्य केंद्र ऊर्जेबाबत स्वावलंबी होणार आहे.

राज्यात अपारंपरिक ऊर्जेच्या उपयोगासाठी सेल्को फाउंडेशन कार्यरत आहे. फाउंडेशनच्या सहकार्याने १८ जिल्ह्यात प्राथमिक आरोग्य केंद्रांचे सौरऊर्जीकरण करण्यात येणार आहे. सौरऊर्जीकरणाचे काम दोन टप्प्यात होणार असून पहिल्या टप्प्यात २५० प्राथमिक आरोग्य केंद्राचे काम पूर्णत्वास आले असून २ हजार प्राथमिक आरोग्य केंद्राचे काम जून २०२६ पर्यंत पूर्ण होईल. सौर ऊर्जेच्या उपयोगामुळे राज्यात दर्जेदार आरोग्य सुविधांची उपलब्धता निर्माण होईल, असा विश्वास मुख्यमंत्री देवेंद्र फडणवीस यांनी व्यक्त केला.

सौरऊर्जीकरणामुळे प्राथमिक आरोग्य केंद्राच्या विजेची गरज पूर्ण होणार असून, सहज वीज उपलब्ध झाल्यास एक तर वीज खंडित होण्याचा प्रश्न भेडसावणार नाही आणि विजेचा खर्चही वाचणार आहे. अर्थात, विजेच्या देयकांमध्ये मोठी बचत होणार आहे. या सौर प्रकल्पामुळे प्राथमिक आरोग्य केंद्राची २४ तास अखंड वीज पुरवठ्याची गरज पूर्ण होणार असून यामुळे आरोग्य सेवा अधिक बळकट होणार असल्याचे फडणवीस यांनी सांगितले.

सेल्को फाउंडेशन ही अपारंपरिक ऊर्जा क्षेत्रात काम करणारी कंपनी आहे. सेल्को फाउंडेशनने यापूर्वी आरोग्य सेवा सुधारण्यासाठी आणि शाश्वत ऊर्जेच्या प्रचारासाठी एक महत्त्वाचे पाऊल म्हणून आयकिया कंपनीच्या सहकार्याने ८ जिल्ह्यांतील प्राथमिक आरोग्य केंद्रांचे सौरऊर्जीकरण पूर्ण केले आहे. सेल्को फाउंडेशन आणि आयकिया कंपनी या प्रकल्पासाठी ५० कोटीची मदत राज्य शासनाला करणार आहे. या प्रकल्पात आरोग्य कर्मचा-यांना सौरऊर्जा प्रणाली वापर आणि देखभालीसाठी प्रशिक्षण सेल्को फाउंडेशन मार्फत देण्यात येणार आहे, असे मुख्यमंत्र्यांनी सांगितले.

८ जिल्ह्यांत सौरऊर्जीकरण पूर्णत्वास, १० जिल्हे बाकी

राज्यात नाशिक, अहिल्यानगर, जळगाव, बुलढाणा, गडचिरोली, नागपूर, लातूर आणि वर्धा या ८ जिल्ह्यांतील प्राथमिक आरोग्य केंद्रांचे सौरऊर्जीकरण पूर्णत्वास आले आहे. तसेच आणखी १० जिल्ह्यांतील प्राथमिक आरोग्य केंद्रांचे सौरऊर्जीकरण सेल्को फाउंडेशनच्या सहकार्याने पूर्ण करण्यात येणार असून प्राथमिक आरोग्य केंद्र ऊर्जेबाबत स्वावलंबी होणार आहे.