Shruti Haasan : “पुरुषांनाही मासिक पाळी यावी म्हणून देवाकडे हजारो वेळा प्रार्थना केली”; श्रुती हासनचं धक्कादायक वक्तव्य
Shruti Haasan : तिला PCOS (पॉलीसिस्टिक ओव्हरी सिंड्रोम)चा त्रास असून, मासिक पाळीदरम्यान तिला तीव्र वेदना होतात. त्यामुळे शूटिंगच्या वेळेस तिच्या शारीरिक स्थितीवरही त्याचा परिणाम व्हायचा.
Shruti Haasan : बॉलिवूड आणि दाक्षिणात्य चित्रपटसृष्टीतील लोकप्रिय अभिनेत्री श्रुती हासन सध्या तिच्या एका वक्तव्यामुळे चर्चेत आली आहे. अभिनेत्री सोहा अली खानच्या पॉडकास्टमध्ये सहभागी झालेल्या श्रुतीने मासिक पाळी आणि महिलांना या काळात भेडसावणाऱ्या शारीरिक समस्यांबाबत मोकळेपणाने भाष्य केलं.
यावेळी तिने पुरुषांनाही मासिक पाळी यावी, अशी इच्छा व्यक्त करत आपण यासाठी देवाकडे हजारो वेळा प्रार्थना केली होती, असा धक्कादायक खुलासा केला. असं वक्तव्य करण्यामागचे कारणही श्रुतीने सांगितलं ती म्हणाली की, तिच्या करिअरच्या सुरुवातीच्या काळात चित्रपटाच्या सेटवर मासिक पाळीबद्दल बोलणंही सहज शक्य नव्हतं. (Shruti Haasan)
तिला PCOS (पॉलीसिस्टिक ओव्हरी सिंड्रोम)चा त्रास असून, मासिक पाळीदरम्यान तिला तीव्र वेदना होतात. त्यामुळे शूटिंगच्या वेळेस तिच्या शारीरिक स्थितीवरही त्याचा परिणाम व्हायचा. त्यामुळे “पुरुषांनाही मासिक पाळी यावी यासाठी मी देवाला हजारो वेळा प्रार्थना केली होती.” ( Shruti Haasan)
Shruti Haasan
करिअरच्या सुरुवातीच्या दिवसांची आठवण सांगताना श्रुती म्हणाली की, शूटिंगदरम्यान तिच्यात ऊर्जा कमी दिसली किंवा ती नेहमीपेक्षा वेगळी वाटली, तर काही दिग्दर्शक नाराज व्हायचे. मात्र, त्यामागचं कारण सांगण्याची मोकळीक तिला सुरुवातीला नव्हती. यावेळी श्रुतीने एका पुरुष सहकलाकाराचा किस्साही सांगितला.
गुडघ्याच्या शस्त्रक्रियेनंतर त्या अभिनेत्याला विश्रांती देण्यात आली आणि त्याच्या सोयीसाठी संपूर्ण टीमने शूटिंगचं वेळापत्रक बदललं. हा अनुभव पाहिल्यानंतर तिच्या मनात प्रश्न निर्माण झाला की, गुडघ्याच्या दुखापतीसाठी शूटिंगचं वेळापत्रक बदललं जाऊ शकतं, तर मासिक पाळीच्या तीव्र वेदनांसाठी तशी संवेदनशीलता का दाखवली जात नाही?
श्रुतीने पुढे सांगितलं की, एकदा तिने एका दिग्दर्शकाला स्पष्टपणे सांगितलं की, ती मासिक पाळीच्या त्रासातून जात आहे. सुदैवाने त्या दिग्दर्शकाला स्वतःची मुलगी असल्याने आणि तिलाही अशाच वेदनांचा सामना करावा लागत असल्याने त्याला श्रुतीची परिस्थिती समजली. त्यानंतर त्या दिवशी सेटवरील वातावरण पूर्णपणे बदललं, असंही तिने सांगितलं.
दरम्यान, कामाच्या आघाडीवर श्रुती हासन शेवटची रजनीकांत यांच्या ‘कुली’ सिनेमात दिसली होती. आता ती विजय सेतुपतीसोबत ‘ट्रेन’ आणि दुल्कर सलमानसोबत ‘आकाशमालो ओका तारा’ या आगामी सिनेमांत झळकणार आहे.
