Pratap Sarnaik – येथील नवीन एस.टी. बसस्थानकाच्या रखडलेल्या बांधकामाची परिवहनमंत्री प्रताप सरनाईक यांनी रविवारी अचानक पाहणी करून कामातील दिरंगाईबद्दल तीव्र नाराजी व्यक्त केली. कोणतीही सबब न सांगता दर्जेदार व निर्धारित मुदतीत काम पूर्ण करण्याचे स्पष्ट निर्देश त्यांनी संबंधित अधिकारी आणि कंत्राटदारांना दिले. यावेळी मंत्री नाईक यांनी बसस्थानक परिसरातील स्वच्छता, प्रवाशांसाठी उपलब्ध असलेल्या सुविधा, बससेवेचे नियोजन तसेच सुरू असलेल्या बांधकामाची पाहणी केली.

उपस्थित प्रवाशांशी संवाद साधून त्यांच्या अडचणी जाणून घेतल्या व त्या तातडीने सोडविण्याच्या सूचना अधिकार्‍यांना दिल्या. कामातील विलंबाची कारणे जाणून घेतल्यानंतर कामाचा वेग वाढवून गुणवत्तेशी कोणतीही तडजोड न करता निर्धारित वेळेत बसस्थानकाचे बांधकाम पूर्ण करण्याचे आदेश त्यांनी संबंधितांना दिले. दिरंगाई झाल्यास संबंधितांवर जबाबदारी निश्चित करण्यात येईल, असा इशाराही त्यांनी यावेळी दिला. परिवहनमंत्र्यांच्या अचानक पाहणीमुळे अनेक महिन्यांपासून रखडलेल्या बसस्थानकाच्या कामाला गती मिळेल, अशी अपेक्षा लोणंदकरांनी व्यक्त केली आहे.

पोलीस चौकीची मागणी
नवीन एस.टी. बसस्थानकात प्रवाशांच्या सुरक्षिततेच्या दृष्टीने स्वतंत्र पोलीस चौकीसाठी जागा राखीव ठेवावी, अशी मागणी सामाजिक कार्यकर्ते नीलेश निवसे यांनी परिवहनमंत्र्यांकडे केली. या मागणीला स्थानिक सामाजिक कार्यकर्त्यांनीही पाठिंबा दिला. बसस्थानक परिसरात पोलीस चौकी झाल्यास प्रवाशांची सुरक्षा आणि कायदा-सुव्यवस्था अधिक प्रभावीपणे राखता येईल, असे मत यावेळी व्यक्त करण्यात आले.