Bjp News : देशाचे संरक्षणमंत्री आणि भाजपचे ज्येष्ठ नेते राजनाथ सिंह यांच्या कुटुंबावर दुःखाचा डोंगर कोसळला आहे. त्यांचे पुतणे प्रशांत सिंह (वय 29) यांचा मध्य प्रदेशातील भीषण रस्ते अपघातात मृत्यू झाला आहे. देवासहून इंदूरकडे परतत असताना भरधाव बसने दिलेल्या धडकेत त्यांचा जागीच मृत्यू झाला. (Bjp News)

पोलिसांनी दिलेल्या माहितीनुसार, ही घटना गुरुवारी रात्री सुमारे 11 वाजण्याच्या सुमारास घडली. प्रशांत सिंह मित्रांसोबत देवासहून इंदूरला जात होते. तातडीच्या कामासाठी त्यांनी आपली कार रस्त्याच्या कडेला थांबवली होती. काम आटोपून ते पुन्हा कारकडे जात असताना भरधाव बसने त्यांना जोरदार धडक दिली. (Bjp News)

धडक इतकी भीषण होती की प्रशांत सिंह दूर फेकले गेले आणि त्यांच्या डोक्याला गंभीर दुखापत झाली. मित्रांनी त्यांना तातडीने जवळील अरबिंदो रुग्णालयात दाखल केले. मात्र, डॉक्टरांनी तपासणीनंतर त्यांना मृत घोषित केले. (Bjp News)

पोलिसांकडून तपास सुरू

अपघातानंतर बसचालक घटनास्थळावरून फरार झाला. पोलिसांनी गुन्हा दाखल करून त्याचा शोध सुरू केला आहे. घटनास्थळाचा पंचनामा करून मृतदेह शवविच्छेदनासाठी सरकारी रुग्णालयात पाठवण्यात आला. (Bjp News)

राजनाथ सिंह यांचे पुतणे

प्रशांत सिंह हे उत्तर प्रदेशातील बलिया जिल्ह्यातील रेवती परिसरातील गायघाट गावचे रहिवासी होते. त्यांचे वडील प्रदीप सिंह हे संरक्षणमंत्री राजनाथ सिंह यांचे चुलत भाऊ असल्याने प्रशांत हे राजनाथ सिंह यांचे पुतणे होते. (Bjp News)

भाजप नेत्यांची रुग्णालयात धाव

घटनेची माहिती मिळताच स्थानिक भाजप पदाधिकारी आणि नेत्यांनी तातडीने रुग्णालयात धाव घेतली. सोनकच्छचे आमदार राजेश सोनकर यांच्यासह अनेक नेत्यांनी कुटुंबीयांची भेट घेत पोलिसांना त्वरित कारवाई करण्याचे निर्देश दिले. (Bjp News)

शवविच्छेदनानंतर प्रशांत सिंह यांचा मृतदेह त्यांच्या मूळ गावी बलिया येथे नेण्यात आला. त्यांच्या अकाली निधनामुळे सिंह कुटुंबासह परिसरात शोककळा पसरली असून, अनेकांनी त्यांना श्रद्धांजली अर्पण केली आहे. (Bjp News)