Prashant Jagtap – गणेशोत्सवाला नाही तर, डीजेच्या दणदणाटाला, ध्वनिप्रदूषणाला काँग्रेसचा विरोध असल्याचे पक्षाचे पूर्व विभागाचे शहराध्यक्ष प्रशांत जगताप रविवारी स्पष्ट केले. डीजे विरोधातील तापलेल्या वातावरणावर जगताप म्हणाले, पुण्याने जगाला गणेशोत्सवाचे वैभव दिल्याचा काँग्रेसला अभिमान आहे. परंपरेच्या नावाखाली राजकीय आशीर्वादाने सध्या डीजेचा दणदणाट सुरू असल्याने गणेशोत्सव बदनाम होत आहे.

उत्सव सर्वांना आनंद देणारा असतो. वृध्दांना, नवजात बालकांना, गतिमंद बालकांना, मुक्या प्राण्यांना असहाय्य आवाजाचा त्रास देऊन आपण आपली संस्कृती नासवतोय काय ? हा प्रश्न निआहे. दुर्दैवाने सध्या गल्ली ते दिल्ली अशा उन्मादाला बळ देणारे सरकार आहे. त्यामुळे उत्सवांला गालबोट लावणाऱ्या प्रकारांना विरोध करणाऱ्या नागरिकांना कुत्र्याची उपमा देण्यापर्यंत भाजप शहराध्यक्षांची मजल गेली आहे. ही बाब तीव्र निषेधार्ह आहे.

देशाचे नागरिक असलेले विद्याधर बापट डीजेच्या दणदणाटाला तार्किक, सभ्य भाषेत विरोध करत आहेत. त्यांच्या अभ्यासपूर्ण मांडणीला विरोध करण्याची बौद्धिक कुवत भाजपमध्ये नाही. म्हणून त्यांना गल्लीत कुत्रा विचारत नाही असे वक्तव्य केले गेले. ज्यांनी भाजपला सत्ता दिली, त्यांनी आपला आवाज मांडण्यासाठी गल्लीतल्या कुत्र्यांकडून प्रमाणपत्र आणावे का ? असा प्रश्नही जगताप यांनी उपस्थित केला.

नागरिकांनी भाजपावर विश्वास ठेवून गल्लीपासून दिल्लीपर्यंतची सत्ता दिली. याच भाजपासाठी नागरिक कुत्र्यासमान आहेत हे दिसून आले आहे. सामान्य पुणेकर हे विसरणार नाहीत. आता हेच नागरिक भाजपाचा माज उतरवतील, भाजपाला दिल्लीतून पुन्हा गल्लीत आणतील असा टोलाही त्यांनी लगाविला.