पुणे – मराठा आरक्षणाच्या मागणीसाठी काढण्यात येणाऱ्या मराठा समाजाच्या मोर्चाला पाठिंबा देण्याची घोषणा वंचित बहुजन आघाडीने केली आहे. यावेळी प्रकाश आंबेडकर यांनी छत्रपती उदयनराजे भोसले यांचा नामोल्लेख टाळत एक राजा बिनडोक असल्ल्याची टीका केली आहे. खासदार उदयनराजे भोसले आणि खासदार संभाजीराजे छत्रपती यांनी मराठा समाजाच्या आरक्षणाच्या मागणीसाठी नेतृत्व करावे, अशी मागणी होत आहे. याविषयी प्रश्न विचारला असता प्रकाश आंबेडकर म्हणाले कि, दोन्ही राजांचा बंदला पाठिंबा आहे, असे कुठे वाचनात आले नाही. एक राजा तर बिनडोक असल्याचे मी म्हणेन, तर दुसरे संभाजी राजे यांनी आरक्षणाबद्दल घेतलेली भूमिका बरोबर आहे. पण आरक्षणापेक्षा ते इतर गोष्टींवर अधिकभर देत असल्याचे मला दिसत आहे, अशा शब्दांत त्यांनी टीका केली आहे. राज्य घटना ज्या माणसाला माहिती नाही. आरक्षण आम्हाला मिळाले नाही, तर सर्वांचे आरक्षण रद्द करा, अशी भूमिका ते मांडतात. भाजपने त्यावरून राज्यसभेवर कसे पाठवले? असा प्रश्न पडत आहे. तसेच कोणालाही अंगावर घेण्यास मी घाबरत नसल्याचेही प्रकाश आंबेडकर म्हणाले. प्रकाश आंबेडकर यांनी पुढे म्हंटले कि, मराठा आरक्षण समितीमधील सुरेश पाटील यांनी काल मला फोन करून, १० तारखेच्या मोर्चा आणि बंदला पाठिंबा द्यावा, अशी मागणी केली. यावर पदाधिकारी आणि कार्यकर्त्यांसोबत चर्चा करून मी पाठिंबा दर्शवला आहे. तसेच मराठा आरक्षण हे वेगळे असून, ओबीसी समाजाचे देखील आरक्षण वेगळे आहे. त्यामुळे या दोन्ही गोष्टी वेगळ्या राहतील, हे लक्षात घेऊन, ओबीसीच्या आरक्षणामध्ये आम्हाला आरक्षण द्या, अशी मागणी होणार नाही. याबाबतची दक्षता सुरेश पाटील यांनी घ्यावी, असे आंबेडकर म्हणाले. मराठा आरक्षण वादामुळे महाराष्ट्राचे सामाजिक स्वास्थ बिघडू नये, असेही प्रकाश आंबेडकर यांनी यावेळी सांगितले.
