Prakash Ambedkar । Lok Sabha Election 2024 – वंचित बहुजन आघाडीचे नेते प्रकाश आंबेडकर आज दिल्ली दौऱ्यावर आहेत. त्यांनी केंद्रीय निवडणूक आयोगाची भेट घेतली आहे. वंचित बहुजन आघाडीला दिल्या जाणाऱ्या निवडणूक चिन्हाबाबत ही भेट असल्याचे प्रकाश आंबेडकरांनी म्हटले आहे. ( Prakash Ambedkar ) 

त्यांनी तीन चिन्हांची मागणी केली आहे, त्यात गॅस सिलिंडर, शिट्टी आणि रोड रोलर यांचा समावेश आहे. यापैकी एक चिन्ह वंचितला मिळण्याची शक्यता आहे. महाविकास आघाडी किंवा महायुतीत सहभागी होणार का,

या प्रश्नावर त्यांनी त्याबाबत मला माहित नाही म्हटले आहे. यामुळे आघाडीसोबतची वंचितची चर्चा आता संपुष्टात आल्याचेच संकेत प्रकाश आंबेडकरांनी दिले आहेत.

प्रकाश आंबेडकरांनी दोन दिवसांपूर्वीच काँग्रेस अध्यक्ष मल्लिकार्जुन खर्गेंना पत्र लिहून राज्यातील सात जागांवर वंचित बहुजन आघाडी तुम्हाला पाठिंबा देईल असे म्हटले होते. त्यांच्या या प्रस्तावावर काँग्रेसकडून कोणतेही उत्तर आलेले नाही.

त्यानंतर आंबेडकरांनी आता निवडणुक आयोगाकडे लोकसभा निवडणुकीसाठी चिन्हाची मागणी केली आहे. त्यांनी गॅस सिलिंडर, शिट्टी, रोड रोलर या चिन्हांचा पर्याय दिला आहे. यापैकी एक चिन्ह त्यांना मिळेल.

अरविंद केजरीवाल यांना झालेली अटक बेकायदेशीर –

दिल्लीचे मुख्यमंत्री अरविंद केजरीवाल यांना ईडीकडून झालेली अटक बेकायदेशीर असल्याचे ते म्हणाले. मुख्यमंत्री अरविंद केजरीवाल यांच्या सरकारने अबकारी धोरण ठरवले होते. तो त्यांच्या मंत्रिमंडळाचा निर्णय होता.

मंत्रिमंडळाच्या निर्णयाला कोर्ट किंवा तपास यंत्रणा आव्हान देऊ शकत नाहीत, मात्र मोदी आणि शहा यांचे सरकार घटनाबाह्य काम करत आहेत, असा आरोप प्रकाश आंबेडकरांनी करत केजरीवालांच्या अटकेचा निषेधही केला.