Prakash Abitkar – सर्पदंशावरील प्रतिबंधित लसींच्या उपलब्धतेचे नियोजन अधिक सक्षम करणार असल्याचे राज्याचे आरोग्यमंत्री प्रकाश आबिटकर यांनी जाहीर केले असून, सर्पदंश आता अधिसूचित आजार म्हणून घोषित करण्यात आला आहे. त्यामुळे आता यावरील उपचारांबाबत बऱ्यापैकी स्पष्टता येण्याला मदत होणार आहे. ग्रामीण आणि दुर्गम भागातील नागरिकांना सर्पदंशाचा धोका अधिक असतो.

सर्पदंशाची विषबाधा ही संभाव्यतः जीवघेणी स्थिती असून, वेळेत निदान, योग्य प्रथमोपचार, तातडीने रुग्णालयात दाखल करणे आणि आवश्यकतेनुसार सर्पविष प्रतिबंधक लस उपलब्ध करून देणे अत्यंत महत्त्वाचे आहे. या पार्श्वभूमीवर राज्यातील सर्पदंशाच्या घटनांची शास्त्रशुद्ध नोंद आणि त्यावर आधारित प्रतिबंधात्मक उपाययोजना करण्यासाठी सरकारने ही अधिसूचना लागू केली आहे.

राज्यातील सर्पदंशाच्या घटनांमुळे होणारे मृत्यू आणि अपंगत्व रोखण्यासाठी सार्वजनिक आरोग्य विभागाने महत्वाचे पाऊल उचलले असून सर्पदंशाला अधिसूचित आजार म्हणून घोषित केले आहे. त्यामुळे राज्यातील सरकारी, खासगी रुग्णालये, वैद्यकीय महाविद्यालये आणि वैद्यकीय व्यवसायिकांना सर्पदंशाच्या प्रत्येक संशयित, संभाव्य किंवा निश्चित घटनेची आणि सर्पदंशामुळे झालेल्या मृत्यूची नोंद संबंधित आरोग्य प्राधिकरणाकडे करणे बंधनकारक राहणार आहे,

याबाबतची अधिसूचना जाहीर झाली असून, या निर्णयामुळे सर्पदंशाच्या घटना प्रभावीपणे हाताळल्या जातील. राज्यातील प्रत्येक आरोग्य संस्था आणि वैद्यक व्यावसायिकाने त्यांच्या निदर्शनास आलेली किंवा उपचाराधीन असलेली सर्पदंशाची प्रत्येक संशयित, संभाव्य किंवा निश्चित घटना संबंधित जिल्हा आरोग्य अधिकारी अथवा जिल्हा शल्यचिकित्सकांना कळविणे आवश्यक राहणार आहे.

गंभीर किंवा प्राणघातक घटना, सर्पदंशामुळे झालेल्या मृत्यूची माहिती उपलब्ध संवाद यंत्रणेद्वारे तत्काळ देणे बंधनकारक करण्यात आले आहे. ही माहिती आरोग्य व्यवस्थापन माहिती प्रणाली, एकात्मिक रोग सर्वेक्षण कार्यक्रम किंवा सरकारने निश्चित केलेल्या अन्य अहवाल प्रणालीमध्ये नोंदविण्यात येणार आहे. त्यामुळे राज्यातील सर्पदंशाच्या घटनांचा अद्ययावत आणि विश्वासार्ह माहिती उपलब्ध होण्याला मदत होणार आहे.