Pooja Khedkar-Pankaja Munde। वादग्रस्त आयएएस अधिकारी पूजा खेडकर आणि त्यांच्या कुटुंबांचे कारनामे काही केल्या कमी होताना दिसत नाहीत. रोज नवीन प्रकरण समोर येत आहे. त्यातच या कुटुंबावर कोणाचा राजकीय वरदहस्त आहे याविषयी राजकीय वर्तुळातून चर्चा सुरु आहे. त्यातच आता भाजपच्या नवनिर्वाचित आमदार पंकजा मुंडे यांचे नाव यासर्व प्रकरणामध्ये समोर येत आहे. त्यामुळे त्यांच्या अडचणी वाढण्याची शक्यता आहे. मनोरमा खेडकरांची मुंडेंच्या ट्रस्टला लाखोंची देणगी Pooja Khedkar-Pankaja Munde। आमदार पंकजा मुंडे अध्यक्ष असलेल्या गोपीनाथ मुंडे प्रतिष्ठान या ट्रस्टला पूजा खेडकर यांच्या आई मनोरमा खेडकर यांनी 12 लाख रुपयांची देणगी दिल्याचं समोर आलंय. 3 ऑक्टोबर 2023 रोजी एका चेकच्या माध्यमातून ही देणगी देण्यात आलीय. याविषयीची माहिती एका इंग्रजी वर्तमानपत्राने दिली आहे. दरम्यान, भाजप नेत्या पंकजा मुंडे यांना लोकसभेची उमेदवारी मिळावी यासाठी दिलीप खेडकर यांनी पाथर्डीमधील मोहटा देवीला दीड किलोचा चांदीचा मुकुटदेखील अर्पण केला होता. त्याचबरोबर दिलीप खेडकर यांचे भाऊ माणिक खेडकर हे पाच वर्षांपासून भाजपचे पाथर्डी तालुका अध्यक्ष राहिलेले आहेत.स्वतः दिलीप खेडकर हे भाजपशी संबंधित राहिले आहेत. मात्र लोकसभा निवडणुकीच्या आधी भाजपमधून तिकीट न मिळाल्याने ऐनवेळी त्यांनी वंचित बहुजन आघाडीत प्रवेश करुन लोकसभेची निवडणूक लढवली होती. आपल्या चमकोगिरीने अडचणीत आलेल्या आणि नंतर एकाहून एक कारनामे बाहेर पडलेल्या आयएएस अधिकारी पूजा खेडकर यांच्यामागे कुणाचे राजकीय पाठबळ आहे असा प्रश्न विचारला जात आहे. पूजा खेडकरांनी बनावट अंपंगत्वाचा दाखला तसेच खोटी माहिती देऊन ओबीसी क्रिमी लेअर सर्टिफिकेट काढल्याचं समोर आलं आहे. यापैकी कोणत्याही प्रवर्गात त्या बसत नसताना त्यांना ही खोटी सर्टिफिकेट कुणी दिली असा प्रश्न विचारला जात आहे. खेडकर कुटुंबीयांचा शोध सुरू Pooja Khedkar-Pankaja Munde। खेडकर कुटुंबाचा पुणे ग्रामीण पोलिसांकडून शोध सुरु करण्यात आला असून खेडकर कुटुंबाशी संपर्क होत नसल्याच पुणे पोलिसांच म्हणणं आहे. खेडकर कुटुंब आणि त्यांच्यासह गुन्हा दाखल करण्यात आलेल्या सात जणांचा शोध घेण्यासाठी पुणे ग्रामीण पोलिसांनी स्थानिक गुन्हे शाखेची तीन पथके तयार केली आहेत.पौड पोलिसांच्या मदतीने खेडकर कुटुंबाचा शोध घेतला जातोय. या सर्वांचे मोबाईल फोन देखील स्वीच ऑफ असल्याचं पोलिसांच म्हणणं आहे. पुणे पोलिसांनी रविवारी खेडकर कुटुंबाच्या पुण्यातील बाणेर भागातील बंगल्यात जाऊन तपासण्याचा प्रयत्न केला. मात्र बंगल्याचे गेट बंद असल्याचे आढळून आल्यानंतर पोलिसांनी या बंगल्याचे चित्रिकरण केले आहे.
