Ramesh Thorat : भाजपने पुणे जिल्ह्यात आपली ताकद वाढवायला सुरूवात केली आहे. येत्या काही महिन्यांवर स्थानिक स्वराज्य संस्थांच्या निवडणुका लागणार असल्याने आत्तापासूनच भाजपने जोरदार तयारी सुरू केली आहे. काँग्रेसशी एकनिष्ठ असलेले माजी आमदार संग्राम थोपटे यांनी काही महिन्यांपूर्वी भाजपची कास धरली.

नुकताच पुणे जिल्ह्यातील काँग्रेसचं मोठं नाव पुरंदरचे माजी आमदार संजय जगताप यांना गळाला लावण्यात भाजपला यश आलं. त्यांनीही आपल्या हाती कमळ घेतलं आहे. या सगळ्या घडामोडी होत असताना दौंडमधून राजकीय बातमी समोर आली आहे.

भाजप आपली ताकद वाढवत असतानाच आता येत्या काळात दौंडमध्ये मोठा राजकीय भूकंप होण्याची शक्यता वर्तवण्यात आली आहे. दौंडचे माजी आमदार आणि शरद पवार यांचे विश्वासू रमेश थोरात लवकरच आपल्या हाती ‘घड्याळ’ बांधणार असल्याच्या चर्चांना उधाण आले आहे. त्याअनुषंगाने रमेश थोरात यांच्या कार्यकर्त्यांच्या बैठकादेखील सुरू असल्याची माहिती आहे.

पक्षप्रवेशासाठी आग्रह 

आगामी काळात येणाऱ्या स्थानिक स्वराज्य संस्थांच्या निवडणुकीच्या पार्श्वभूमीवर अजित दादांकडून राष्ट्रवादीची ताकद वाढविण्यावर भर  दिला जात असल्याचे दिसत आहे. पुणे जिल्हा परिषद आणि पुणे जिल्हा मध्यवर्ती बँकांच्या निवडणुका देखील होणार आहेत. याच पार्श्वभूमीवर अजित पवार यांनी रमेश थोरात यांना पक्षप्रवेशासाठी आग्रह धरला असल्याच्या चर्चा होत आहेत.

शरद पवारांना धक्का?

यामुळे आगामी काळात जर रमेश थोरात यांनी शरद पवारांची साथ सोडल्यास शरद पवारांच्या राष्ट्रवादीला मोठा धक्का बसू शकतो. याचा परिणाम स्थानिक स्वराज्य संस्थांच्या निवडणुकीत होऊ शकतो असे सांगितले जात आहे. यामुळे या संपूर्ण राजकीय गणितांचा विचार करता रमेश थोरात काय निर्णय घेणार हे पाहणे अत्यंत महत्वाचे असणार आहे.

रमेश थोरात यांच्याविषयी…

१९७८ ते १९९०- सरपंच, खुटबाव ग्रामपंचायत
१९८४ पासून पुणे जिल्हा मध्यवर्ती सहकारी बॅंकेचे संचालक
१९८५- १९८७- उपाध्यक्ष, पुणे जिल्हा मध्यवर्ती सहकारी बॅंक
१९९०- २०२१- सहा वेळा पुणे जिल्हा मध्यवर्ती सहकारी बॅंकेचे अध्यक्ष
१९९२- २००२- उपाध्यक्ष, भीमा सहकारी साखर कारखाना, मधुकरनगर- पाटस
२००१- २००९- संचालक, पुणे जिल्हा सहकारी दूध उत्पादक संघ (कात्रज)
२००९- २०१४- आमदार (अपक्ष)

हेही वाचा :  Karuna Sharma : “आधी मनसोक्त हनीमूनचा आनंद, आता तेच ‘हनी ट्रॅप’ वाटतोय”; करुणा शर्मांचा स्फोटक सवाल