Political News : सध्या देशाच्या राजकारणात फोडाफोडीच्या राजकारणाला (Political News) मोठा वेग आला आहे. महाराष्ट्रात उद्धव ठाकरे यांच्या शिवसेना (ठाकरे गट) पक्षाला लागोपाठ दोन मोठे धक्के बसले आहेत.

एकीकडे पक्षाच्या ६ खासदारांनी एकाच वेळी बंडखोरी करत मुख्यमंत्री एकनाथ शिंदे यांच्या शिवसेनेत प्रवेश केला, तर दुसरीकडे ज्येष्ठ नेते सचिन अहिर यांनीही उद्धव ठाकरेंची साथ सोडली आहे.

महाराष्ट्रात आधी पार पडलेल्या ‘ऑपरेशन टायगर’नंतर आता दबक्या आवाजात ‘ऑपरेशन तुतारी’ची (शरद पवार गटाबाबत) जोरदार चर्चा सुरू झाली आहे.

महाराष्ट्रात या राजकीय घडामोडी वेगाने घडत असतानाच, दक्षिण भारतातून म्हणजेच तामिळनाडूमधून एक अत्यंत मोठी आणि धक्कादायक राजकीय (Political News) बातमी समोर आली आहे.

तामिळनाडूचे नवीन मुख्यमंत्री ‘थलपती’ विजय यांच्या टीव्हीके (तमिलगा वेट्टी कळघम) पक्षाने राज्यातील मुख्य विरोधी पक्ष असलेल्या ‘ऑल इंडिया अण्णा द्रविड मुनेत्र कळघम’ ला अत्यंत मोठा आणि अनपेक्षित धक्का दिला आहे.

एआयएडीएमके मध्ये मोठी फूट

तामिळनाडूच्या राजकारणातील मातब्बर पक्ष असलेल्या एआयएडीएमकेमध्ये मोठी फूट पडली आहे. पक्षाचे ज्येष्ठ नेते आणि माजी मंत्री डॉ. सी. विजयभास्कर, एम. आर. विजयभास्कर आणि एम. एस. एम. आनंद या तीन बड्या नेत्यांनी आपल्या हजारो समर्थकांसह थेट ‘टीव्हीके’ पक्षाची वाट धरली आहे. विरोधी पक्षासाठी हा आतापर्यंतचा सर्वात मोठा धक्का मानला जात आहे.

गुरूवारी मामल्लापुरम येथे एका भव्य कार्यक्रमाचे आयोजन करण्यात आले होते. या सोहळ्यात ‘टीव्हीके’चे सरचिटणीस एन. आनंद यांच्या उपस्थितीत या तिन्ही नेत्यांनी अधिकृतपणे पक्षात प्रवेश केला. पक्षात प्रवेश करताच या नेत्यांनी मुख्यमंत्री थलपती विजय यांच्या कार्यपद्धतीचे आणि दूरदृष्टीचे तोंडभरून कौतुक केले.

थलपती विजय यांचा पलटवार

नुकत्याच झालेल्या तामिळनाडू विधानसभा निवडणुकीत अभिनेते ते राजकारणी बनलेल्या थलपती विजय यांचा ‘टीव्हीके’ पक्ष १०७ जागा जिंकून सर्वात मोठा पक्ष ठरला होता. मात्र, स्पष्ट बहुमतासाठी आवश्यक असलेला आकडा पक्षाकडे नव्हता. अखेर थलपती विजय यांनी काँग्रेसच्या पाठिंब्याने राज्यात सत्ता स्थापन केली. विजय यांचे हे सरकार तामिळनाडूतील ‘डीएमके’ आणि ‘एआयएडीएमके’ या दोन्ही पारंपरिक बलाढ्य पक्षांसाठी मोठा धक्का मानला जात होते.

सूत्रांनी दिलेल्या माहितीनुसार, थलपती विजय यांचे सरकार पाडण्यासाठी आणि त्यांचे आमदार फोडून सरकार अल्पमतात आणण्यासाठी विरोधी पक्षांकडून पडद्यामागे मोठ्या हालचाली व कारस्थाने सुरू होती. मात्र, हे कारस्थान ओळखून मुख्यमंत्री विजय यांनी स्वतःच मोठा राजकीय डाव टाकला आणि थेट विरोधी पक्षाचेच बडे नेते फोडून त्यांना चितपट केले.

प्रस्थापित पक्षांची डोकेदुखी वाढली

या तीन वजनदार नेत्यांच्या आणि त्यांच्या समर्थकांच्या पक्षप्रवेशामुळे थलपती विजय यांचा ‘टीव्हीके’ पक्ष आता तळागाळात आणखी मजबूत झाला आहे. तामिळनाडूच्या राजकारणावर वर्षानुवर्षे पकड असणाऱ्या प्रस्थापित पक्षांना शह देण्यासाठी मुख्यमंत्री विजय यांचा हा मास्टरस्ट्रोक अत्यंत महत्त्वाचा मानला जात असून, यामुळे दक्षिणेतील राजकारणाला आता एक नवी दिशा मिळाली आहे.