Political clash : सांगली जिल्ह्यातील विटा शहरात राजकीय वातावरण पुन्हा तापले असून राष्ट्रवादी काँग्रेस शरद पवार गटाच्या पदाधिकाऱ्याला लक्ष्य करण्यात आल्याचा गंभीर आरोप समोर आला आहे. सोशल मीडियावरील मोबाईल स्टेटसच्या वादातून हा संपूर्ण प्रकार घडल्याचे सांगितले जात आहे. आमदार गोपीचंद पाडळकर यांच्या समर्थकांनी कार्यालयावर हल्ला करत तोडफोड केल्याचा आरोप करण्यात आला आहे. या घटनेमुळे विटा शहरात तणावाचे वातावरण निर्माण झाले असून भाजप आणि राष्ट्रवादी काँग्रेस कार्यकर्त्यांमध्ये पुन्हा संघर्ष पेटण्याची शक्यता व्यक्त केली जात आहे. राष्ट्रवादी काँग्रेस शरद पवार गटाचे सरचिटणीस महेश कुपाडे यांनी गंभीर आरोप करत सांगितले की, पडळकर समर्थकांनी त्यांच्या ट्रॅव्हल्स बुकिंग कार्यालयाची तोडफोड केली, वाहनांचे नुकसान केले तसेच घरावर दगडफेकही करण्यात आली. या घटनेनंतर परिसरात मोठी खळबळ उडाली आहे. महेश कुपाडे यांनी विटा पोलिस ठाण्यात तक्रार दाखल केली असून संबंधितांवर कठोर कारवाई करण्याची मागणी केली आहे. मिळालेल्या माहितीनुसार, सोशल मीडियावर ठेवलेल्या एका स्टेटसवरून हा वाद सुरू झाला. संबंधित स्टेटसबाबत पडळकर समर्थकांनी महेश कुपाडे यांना फोन करून जाब विचारल्याचा आरोप आहे. यानंतर दोन्ही गटांमध्ये शाब्दिक वाद वाढला. महेश कुपाडे यांनी माफी मागण्यास नकार दिल्यानंतर संतप्त कार्यकर्त्यांनी कार्यालयात घुसून तोडफोड केल्याचा आरोप करण्यात येत आहे. या घटनेत महेश कुपाडे आणि अमृता कुपाडे यांच्या ट्रॅव्हल्स बुकिंग कार्यालयाचे नुकसान झाल्याचे सांगितले जात आहे. कार्यालयातील साहित्याची तोडफोड करण्यात आली असून बाहेर उभ्या असलेल्या वाहनांनाही लक्ष्य करण्यात आल्याची माहिती समोर आली आहे. याशिवाय घरावर दगडफेक झाल्याने कुटुंबीयांमध्ये भीतीचे वातावरण निर्माण झाले आहे. दरम्यान, विटा पोलिसांनी या प्रकरणी गुन्हा दाखल करत तपास सुरू केला आहे. पोलिसांकडून परिसरातील सीसीटीव्ही फुटेजची तपासणी केली जात असून प्रत्यक्षदर्शींचे जबाबही नोंदवले जात आहेत. घटनेमागील नेमके कारण, वादात सहभागी असलेल्या व्यक्तींची संख्या आणि तोडफोडीत कोणाचा सहभाग होता याचा तपास सुरू आहे. या घटनेमुळे विटा शहरातील राजकीय वातावरण चांगलेच ढवळून निघाले आहे.