प्रभात वृत्तससेवा राजगुरुनगर – राज्यभरातील पोलीस पाटलांच्या विविध प्रलंबित मागण्यांकडे राज्य सरकारचे लक्ष वेधण्यासाठी येत्या 10 डिसेंबर रोजी नागपूर अधिवेशनाच्या काळात भव्य मोर्चाचे आयोजन करण्यात आले आहे. या मोर्चात राज्यातील जवळपास 15 हजारांहून अधिक पोलीस पाटील सहभागी होणार असल्याची माहिती महाराष्ट्र राज्य गाव पोलीस पाटील संघाचे राज्य अध्यक्ष बाळासाहेब शिंदे पाटील यांनी दिली. मागील अनेक बैठकीत मंत्र्यांनी दिलेल्या आश्वासनांची अद्याप अंमलबजावणी न झाल्यामुळे सरकारला स्मरण करून देण्यासाठी हा मोर्चा आयोजित करण्यात आला आहे. यासाठी राज्यातील सर्व जिल्ह्यांमधून पोलीस पाटलांची मोठ्या संख्येने उपस्थिती अपेक्षित आहे. नागपूर अधिवेशनात होणार्या या मोर्चासाठी आमदार बाबाजी रामचंद्र काळे यांना निवेदन देण्यात आले. हे निवेदन महाराष्ट्र राज्य गाव कामगार पोलीस पाटील संघाचे अध्यक्ष बाळासाहेब शिंदे पाटील यांनी दिले. यावेळी खेड तालुका अध्यक्ष दीपक पावडे, पुणे जिल्हा कार्यकारी अध्यक्ष पप्पुकाका राक्षे, कार्यकारी अध्यक्ष मारुती हुरसाळे, गणेश प्रधान आदी उपस्थित होते. प्रमुख मागण्या पोलीस पाटलांची वयोमर्यादा 60 वरून 65 वर्षे करावी, राज्यातील पोलीस पाटील पदांच्या रिक्त जागा तातडीने भराव्यात, दर पाच वर्षांनी होणारी शासकीय नूतनीकरण प्रक्रिया कायमस्वरूपी बंद करावी, प्रवास भत्ता वाढ करण्यात यावा. या मागण्यांसाठी राज्यभरातील पोलीस पाटील मोठ्या संख्येने नागपूरमध्ये एकत्र येणार आहेत. पुणे जिल्ह्यातून सर्वाधिक पोलीस पाटील सहभागी होणार असल्याची माहिती जिल्हाध्यक्ष अविनाश शेंडगे, कार्याध्यक्ष विजय कुंजीर, कार्यकारी अध्यक्ष पप्पुकाका राक्षे, महिला आघाडीच्या मोनिका कचरे पाटील, उपाध्यक्ष दत्तात्रय चौधरी यांनी दिली.
