पुणे – कोंढवा पोलिस ठाण्यातील एका पोलिसावर खंडणीचा गुन्हा दाखल करण्यात आला आहे. महाविद्यालयीन विद्यार्थ्याच्या बॅगेत हुक्का स्पॉट आढळल्यानंतर, कारवाई करण्याच्या धमकीने या पोलीस कर्मचाऱ्याने २८ हजार रुपयांची खंडणी उकळली आहे. ही घटना बोपदेव घाटात घडली. पोलीस शिपाई विक्रम लक्ष्मण वडतीले आणि त्याचा साथीदार केदार जाधव या दोघांविरुध्द कोंढवा पोलीस ठाण्यात खंडणीचा गुन्हा दाखल झाला आहे. याप्रकरणी अदनान रजा (१९, रा.चेन्नई) याने तक्रार दिली आहे. फिर्यादी हा त्याच्या दोन मित्रांसह बोपदेव घाटात गुरुवारी सकाळी फिरायला गेला होता. तेव्हा तेथे कोंढवा पोलीस ठाण्यात कार्यरत असलेला पोलीस शिपाई विक्रम आणि त्याचा मित्र केदार हे दोघे दाखल झाले. त्या दोघांनी फिर्यादी आणि त्याच्या मित्रांची सॅक तपासली. यातील एका सॅकमध्ये हुक्क्याचे सामान सापडले. याप्रकरणी गुन्हा दाखल करुन अटक करण्याची भिती दाखवत ३० हजाराची मागणी वडतीले याने केली. मात्र तडजोडीअंती फिर्यादीच्या मित्राने केदार जाधव याच्या गुगल पेवर २८ हजार वर्ग केले. याप्रकरणी तक्रार दाखल होताच वडतीले याला निलंबीत करण्यात आले आहे. या प्रकरणाचा तपास पोलीस निरीक्षक नवनाथ जाधव करत आहेत.
