पीओके नेहमीच भारताचा भाग आहे

जम्मू – पाकव्याप्त काश्‍मीर (पीओके) नेहमीच भारताचा अविभाज्य भाग आहे. तेथील लोकांनाही भारतात सामील व्हायची इच्छा आहे. भारताच्या संसदेने एकमताने पीओकेबाबत ठराव संमत केला की, तो भारताचा भाग होता, आहे आणि राहील. पीओकेवर पाकिस्तान सरकार सातत्याने अत्याचार करत आहे. त्यामुळे भविष्यात पीओकेमधूनच त्यांचा भारत देशात समावेश करावा, अशी मागणी पुढे येईल, असे प्रतिपादन संरक्षणमंत्री राजनाथ सिंह यांनी केले आहे.

जम्मू विद्यापीठाच्या जनरल जोरावर सिंग सभागृहात संरक्षण परिषदेला संबोधित करताना राजनाथ सिंह बोलत होते. यावेळी केंद्रीय मंत्री डॉ जितेंद्र सिंह, भाजप प्रदेशाध्यक्ष रवींद्र रैना आणि इतर भाजप नेते उपस्थित होते. येथून संरक्षणमंत्री जम्मू विद्यापीठाकडे रवाना झाले.
राजनाथ सिंह पुढे म्हणाले की, आम्ही भ्रष्टाचार उखडून टाकला असा माझा दावा नाही. असा दावा कोणीही करू शकत नाही.

केवळ भाषणे देऊन ते कमी करता येत नाही, व्यवस्थेत बदल करून ते कमी करता येऊ शकते आणि पंतप्रधानांनी ही प्रक्रिया सुरू केली आहे. मोदी सरकारच्या कारकिर्दीत गेल्या 9 वर्षांत जगात भारताचा दर्जा अनेक पटींनी वाढला असून पंतप्रधान नरेंद्र मोदी यांच्या नेतृत्वाखालील सरकारची ही एक मोठी उपलब्धी आहे.

राजनाथ सिंह पुढे म्हणाले की, भारत स्वतंत्र झाल्यापासून अनेक भारतविरोधी शक्ती भारतात सातत्याने अस्थिरतेचे वातावरण निर्माण करण्याचा प्रयत्न करत आहेत. पाकिस्तानच्या भूमीतून सातत्याने मोठ्या प्रमाणात नापाक प्रयत्न केले जात आहेत. यूपीए सरकारने दहशतवादाविरोधात प्रभावी कारवाई केली नाही, पण पंतप्रधान मोदींच्या नेतृत्वाखाली आमच्या सरकारने दहशतवादाविरोधात प्रभावी कारवाई सुरू केली आहे. दहशतवादाविरुद्ध झिरो टॉलरन्सचा अर्थ काय आहे, हे केवळ देशालाच नव्हे तर जगाला पहिल्यांदाच कळले. आम्ही दहशतवाद्याचा निधी रोखण्याचे मोठे काम केले आहे.

सुरक्षेच्या आव्हानाला तोंड देण्याची क्षमता…
राष्ट्रीय सुरक्षेची जडणघडण तेव्हाच होईल जेव्हा भारत आपल्या संरक्षण गरजा पूर्ण करण्यासाठी इतरांवर अवलंबून राहणार नाही. आज संरक्षण अर्थसंकल्पात भारतीय कंपन्यांकडून वस्तू खरेदीसाठी वेगळे बजेट आहे. आता 75 टक्के शस्त्रे भारतीय कंपन्यांकडूनच खरेदी करण्याची अर्थसंकल्पीय व्यवस्था करण्यात आली आहे. आज, राफेलसारखी 5 व्या पिढीची मल्टिरोल फायटर विमाने हवाई दलाकडे आली आहेत आणि आता भारताच्या सार्वभौमत्व, अखंडता, सीमा सुरक्षेसाठी कोणत्याही आव्हानाला उत्तर देण्याची आपली शक्ती खूप वाढली आहे.