POCSO Case – वर्धनगड, ता. खटाव येथील सलीम अंबिर शिकलगार, (वय ५७) यांच्यावर बालकांचे लैंगिक अत्याचारापासून संरक्षण कायदा अधिनियम २०१२ चे कलम ८ अंतर्गत गुन्हा दाखल करून त्याला न्यायालयात हजर केले असता त्यांना न्यायालयीन कोठडी देण्यात आली. याबाबतची सविस्तर माहिती अशी, २२ मार्च रोजी एका महिलेने पुसेगाव पोलीस ठाण्यात समक्ष हजर राहून तक्रार दाखल केली होती. त्यांच्या आठवी इयत्तेत शिक्षण घेत असलेल्या १४ वर्षे मुलीला शाळा सुटल्यावर सायंकाळी गिरणीमध्ये ज्वारीचे दळण ठेवण्यासाठी पाठविले. त्यावेळी सलीम शिकलगार याने दळण दारात ठेवू नकोस, घरात आत घेऊन ये, असे सांगून ती मुलगी आत गेल्यावर तिचा विनयभंग केला होता. अनपेक्षित घटनेने घाबरून गेलेली मुलगी तेथून पळ काढत, रडत तिच्या घरात पोहोचली व घडलेला प्रकार आईला सांगितला. मुलीचे वडील कामानिमित्त परगावी असल्याने दि. २२ मार्च रोजी ते वर्धनगड येथे पोहोचल्यावर मुलीच्या आईने त्यांना हकीकत सांगितल्यानंतर मुलीचे वडील सलीम शिकलगार यांना घडलेल्या प्रकाराबाबत विचारण्यास गेले असता शिकलगार यांचा मुलगा हुजेफा सलीम शिकलगार याने मुलीच्या वडिलांना धक्काबुक्की व शिवीगाळ करून तू माझ्या आब्बाला विचारायला घरी का आलास असे म्हणून दमदाटी केली. त्यानंतर दोघांनी पुसेगाव पोलीस स्टेशनला येवून मुलीच्या आईने सलीम शिकलगार विरुद्ध तक्रार दाखल केली. पो. हवा. एस. एल. वाघमारे यांनी गुन्हा नोंद केला. स.पो.नि. संदीप पोमण तपास करत असून पोलीस उपअधीक्षक राजश्री तेरणी यांनी तातडीने घटनास्थळी भेट दिली आहे.
