POCSO Case – अल्पवयीन मुलीची छेड काढल्याप्रकरणी प्रसाद श्रीकांत सडके (वय 22, रा. उंचीठाणे ता. खटाव) या आरोपीला वडूज येथील अतिरिक्त व सत्र न्यायालयाने तीन वर्षे सक्तमजुरीची शिक्षा सुनावली. याबाबत माहिती अशी, प्रसाद सडके यांनी पिण्यासाठी पाणी मागण्याच्या बहाण्याने पीडित अल्पवयीन मुलीचा 1 ऑगस्ट 2022 रोजी विनयभंग केला होता. याप्रकरणी औंध पोलीस ठाण्यात गुन्हा नोंदवण्यात आला होता.

पोलीस उपनिरीक्षक जी. बी. केंद्रे यांनी या गुन्ह्याचा तपास करून, आरोपीविरुद्ध वडूज येथील अतिरिक्त जिल्हा व सत्र न्यायालयात दोषारोपपत्र दाखल केले होते. या खटल्यात सरकार पक्षाच्यावतीने अतिरिक्त जिल्हा सरकारी वकील रघुनाथ खोत यांनी काम पाहिले. सुनावणीमध्ये सहा साक्षीदार तपासण्यात आले. सरकारी वकिलांचा युक्तिवाद,

साक्षीदारांचे जबाब आणि पोलिसांनी सादर केलेले पुरावे ग्राह्य धरून अतिरिक्त जिल्हा व सत्र न्यायाधीश एन. एस. कोले यांनी प्रसाद सकडे याला पोक्सो कायद्यानव्ये तीन वर्षे सक्तमजुरी व एक हजार रुपये दंडाची शिक्षा सुनावली. या खटल्यात पोलिस उपअधीक्षक रणजित सावंत आणि सपोनि गणेश वाघमोडे यांच्या मार्गदर्शनाखाली पोलीस प्रॉसिक्युशन स्कॉडचे पोलीस उपनिरीक्षक दत्तात्रय जाधव, हवालदार सी. एस. सानप, विजयालक्ष्मी दडस, सागर सजगणे व अमीर शिकलगार यांनी सरकारी वकिलांना सहकार्य केले.