PMRDA Budget 2026 – मार्च महिना संपत आला असून अद्याप आर्थिक वर्ष एपि्रल २०२६ ते मार्च २०२७ चे अंदाजपत्रक अद्याप सादर केले गेलेले नाही. अंदाजपत्रक हे आगामी आर्थिक वर्षाची दिशा ठरविणारे असते. परंतु आर्थिक वर्ष सुरू झाल्यानंतर अंदाजपत्रक सादर होण्याची चिन्हे दिसत आहे. यंदाही पुणे महानगर प्रदेश विकास प्राधिकरण (पीएमआरडीए)चा अर्थसंकल्प उशिरा सादर होण्याची शक्यता आहे. प्रशासनाकडून सध्या अर्थसंकल्प तयार करण्याचे काम अंतिम टप्प्यात असून, एप्रिलच्या पहिल्या किंवा दुसऱ्या आठवड्यात तो सादर होण्याची शक्यता वर्तवण्यात येत आहे.पीएमआरडीएचे अध्यक्ष असलेल्या मुख्यमंत्र्यांच्या अध्यक्षतेखाली होणाऱ्या बैठकीत हा अर्थसंकल्प मांडला जाणार आहे. मात्र, यापूर्वीही अर्थसंकल्प वेळेत सादर न झाल्याची उदाहरणे आहेत. २०२०-२१ मध्ये अर्थसंकल्प सादरच झाला नव्हता, तर २०२२-२३ मध्ये फेब्रुवारीत सादरीकरण झाले होते. २०२३-२४ मध्ये देखील सदस्यांच्या मंजुरीनंतर सादरीकरण झाले होते. या विलंबामुळे विविध विकासकामांवर परिणाम होणार आहे. पीएमआरडीएचा अर्थसंकल्प सुमारे ७,००० ते ८,५०० कोटी रुपयांच्या दरम्यान असण्याची शक्यता आहे. यात मेट्रो, रिंगरोड, गृहनिर्माण, पाणीपुरवठा योजना आणि पायाभूत सुविधांसाठी मोठ्या प्रमाणात तरतूद अपेक्षित आहे. मात्र निधीच्या मंजुरीला उशीर झाल्यास या प्रकल्पांची अंमलबजावणीही लांबणीवर पडू शकते. अर्थसंकल्प उशिरा सादर झाल्यास ठेकेदारांची देयके अडकण्याची शक्यता आहे, ज्यामुळे कामांचा वेग मंदावेल. प्रशासनाच्या नियोजनावरही याचा परिणाम होऊन वर्षभराचा विकास आराखडा विस्कळीत होऊ शकतो. दरम्यान, पीएमआरडीए प्रशासनाने अर्थसंकल्प सादर करण्यासाठी आवश्यक तयारी पूर्ण केली असून, तो लवकरच मंजुरीसाठी सादर करण्यात येणार असल्याचे सांगितले आहे. मात्र, हा विलंब टाळण्यात अपयश आल्यास नागरिकांना सुविधा मिळण्यात उशीर होणार आणि विकासकामांवर त्याचे दूरगामी परिणाम होतील, अशी भीती व्यक्त केली जात आहे.
