PMC News : भारतीय जनता पक्षाने महापालिकेत निवडून आलेल्या ११९ नगरसेवकांची गटनोंदणी विभागीय आयुक्तांकडे केली आहे. त्यामुळे, भाजपच्या चिन्हावर निवडून आलेल्या रिपाइं (आठवले गट) यांच्यातील गट नोंदणीबाबत सुरू असलेल्या चर्चांना शनिवारी पूर्णविराम मिळाला आहे.त्यामुळे रिपाईचा महापालिकेत पक्षनेता अथवा स्वतंत्र गट आता असणार नाही, हे स्पष्ट झाले आहे. भाजपकडून रिपाईला ८ जागा देण्यात आल्या होत्या. त्यातील पाचजण निवडून आलेले आहेत. त्यामुळे, महापालिकेत पक्षाचा स्वतंत्र गट असावा तसेच मागील सभागृहाप्रमाणेच रिपाईला उपमहापौरपद मिळावे अशी मागणीही पक्षाने केली आहेत. मात्र, भाजपकडून अद्याप पक्षाला कोणतेही आश्वासन अथवा कळविण्यात आलेले नसल्याचे रिपाईच्या नेत्यांकडून सांगण्यात येत आहे. भाजपच्या गट नोंदणीप्रसंगी गटनेते गणेश बिडकर, शहराध्यक्ष धीरज घाटे यांच्यासह, नगरसेवक अनिल टिंगरे यांच्यासह पक्षाचे पदाधिकारी आणि नवनिर्वाचित नगरसेवक उपस्थित होते.महापालिकेतील नियमानुसार प्रत्येक राजकीय पक्षाला आपल्या नगरसेवकांमधून गटनेत्याची निवड करून विभागीय आयुक्तांकडे गट नोंदणी करणे बंधनकारक असते. रिपाइं त्यानुसार भाजपने ज्येष्ठ नगरसेवक आणि माजी सभागृहनेते गणेश बिडकर यांची गटनेतेपदी निवड केली. या निर्णयानंतर भाजपच्या सर्व ११९ नगरसेवकांची गट नोंदणी विभागीय आयुक्त चंद्रकांत पुलकुंडवार यांच्याकडे करण्यात आली. २०१७ च्या महापालिका निवडणुकीत भाजप आणि रिपाइं यांची युती असतानाही रिपाइंच्या नगरसेवकांची स्वतंत्र गट नोंदणी करण्यात आली होती.मात्र, यंदाच्या निवडणुकीत भाजपने कमळ चिन्हावर निवडून आलेल्या सर्व नगरसेवकांची एकत्रित गट नोंदणी केल्याने रिपाइंच्या स्वतंत्र गटाची शक्यता संपुष्टात आली आहे. पक्षाच्या वरिष्ठ नेतृत्वाने सलग तिसऱ्यांदा माझ्यावर गटनेते पदाची जबाबदारी सोपवली, याबद्दल मी मनापासून पक्षाचा आभारी आहे. पुणे शहर अधिक गतिमान, सुरक्षित आणि लोकाभिमुख करण्यासाठी भारतीय जनता पार्टी कटिबद्ध आहे. मेट्रो, नदी सुधारसारखे मोठे विकास प्रकल्प मार्गी लावतानाच, सामान्य पुणेकरांना दैनंदिन जीवनात भेडसावणाऱ्या समस्यांचे निराकरण करण्यावर आमचा विशेष भर असेल. – गणेश बिडकर ( भाजप गटनेते)