PMC News : घरोघरी जाऊन कचरा संकलन करण्याची जबाबदारी महापालिकेने स्वच्छ या संस्थेस दिली आहे. त्या बदल्यात नागरिकांवर वर्गीकृत कचरा व वापरकर्ता शुल्क आकारण्यास संस्थेस मुभा दिली आहे. या शुल्कात निवासी मिळकतीसाठी प्रतीमहिना ५ तर व्यापारी मिळकतींसाठी १० रुपये शुल्कवाढ करण्यास महापालिकेने मान्यता दिली आहे. ही वाढ रहिवासी, व्यावसायिक तसेच झोपडपट्टीमध्ये आकरण्यात येणाऱ्या पूर्वीच्या शुल्कावर करण्यात आली आहे. महापालिका आयुक्तांनी या शुल्कवाढीस नुकतीच मान्यता दिली आहे. शहरात पालिकेने चार हजार स्वच्छता सेवक नेमले असून त्यांच्याकडून शहरातील १० लाख ५ हजार मिळकतीमधील कचरा संकलीत केला जातो. केंद्रशासनाने घनकचरा व्यवस्थापन नियम, २०१६ लागू केले आहेत. या नियमांतर्गत प्रत्येक कचरा निर्मात्याने (नागरिकांनी) विघटनशील (कुजणारा किंवा ओला), अविघटनशील (न कुजणारा किंवा सुका), घरगुती घोकादायक (कीटकनाशकांचे डबे, बल्ब्स, मुदत संपलेली औषधे वापरलेल्या / खराब झालेल्या बॅटरीज, सिरिंज इ.) आणि सॅनिटरी वेस्ट (सॅनिटरी नॅपकिन्स, डायपर्स) असा वर्गीकृत केलेला कचरा महापालिकेने नेमून दिलेल्या व्यक्तीकडे , एजन्सीकडे देणे बंधनकारक केले आहे. यानुसार महानगरपालिका सभा ठराव क्र. ४२३, दिनांक १५/०३/२०२४ अन्वये स्वच्छ पुणे सेवा सहकारी संस्थेच्या कचरा वेचकांमार्फत दारोदारी कचरा संकलन करण्यास मान्यता दिली असून त्यासाठी सदर कचरा वेचकांना नागरिकांकडून खालीलप्रमाणे वापरकर्ता शुल्क आकारण्याची मुभा दिली आहे. आता प्रशासनाने बदल केला असून निवासी व झोपडपट्टीतील घरांसाठी प्रत्येकी ५ रूपये तर व्यावसायिक मिळकतींच्या वापरकर्ता शुल्कात १० रूपयांची वाढ करण्यात आली आहे. घनकचरा व्यवस्थापन विभागाचे उपायुक्त अविनाश सकपाळ यांनी ही माहिती दिली. असे असेल नवीन शुल्क -निवासी मिळकती : ९० रूपये -व्यावसायिक मिळकती :१८० रूपये -झोपडपट्टी घरे : ७० रूपये
