प्रभात वृत्तसेवा पुणे – आघाडी आणि युतीच्या चर्चेचा गोंधळ, उमेदवारीसाठी अखेरच्या दिवसापर्यंत इच्छुकांची सुरू असलेली धडपड, प्रत्येक पक्षाकडे पालिकेच्या जागांपेक्षा चार ते पाच पटीने अधिक आलेले अर्ज यामुळे बंडखोरी रोखण्याचे मोठे आवाहन सर्वच पक्षांच्या समोर होते. यामुळे पक्षांनी उमेदवार यादी जाहीर करण्याऐवजी इच्छुकांना थेट एबी फाॅर्म दिला. अनेक प्रभागांमध्ये दोनपेक्षा अधिक उमेदवारांना हे फाॅर्म दिले असून, त्यांच्याकडून ते सादरही केले आहेत. त्यामुळे ज्या उमेदवारांचा एबी फाॅर्म आधी आला असेल तोच पक्षाचा अधिकृत उमेदवार असेल असे पालिकेच्या निवडणूक विभागाने स्पष्ट केले आहे. अर्ज भरून घेताना कागदपत्रे सादर केल्याची वेळ नमूद केली असल्याने जो अर्ज आधी सादर झाला तोच उमेदवार अधिकृत असणार आहे. फाॅर्म वाटपाचा गोंधळ अखेरच्या दिवशी उमेदवारी अर्ज भरण्याची दुपारी तीनपर्यंत वेळ असतानाही भाजप वगळता बाकीच्या पक्षांनी दुपारी १२ नंतर एबी फाॅर्म देण्यास सुरुवात केली. काही इच्छुकांनी आधीच पक्षाच्या वरिष्ठ नेत्यांकडे सेटींग लावत आपले नाव आले असल्याचे निश्चित करून हे फाॅर्म घेण्यासाठी पक्षाने नेमलेल्या निरीक्षकांची शोधाशोध सुरू केली. त्यानंतर पुढील अर्ध्या तासातच हे फाॅर्म कुठे दिले जात आहेत, याची कुणकुण लागल्यानंतर इच्छुकांनी संबंधित ठिकाणी गर्दी केली. यावेळी गोंधळही घातला. अनेक इच्छुक हमरीतुमरीवर आल्याचे व्हिडीओही सोशल मीडियावर व्हायरल झाले. अचानक गोंधळ झाल्याने अनेक राजकीय पक्षांनी एकाच प्रभागात दोन उमेदवारांना एबी फाॅर्म दिले. त्यामुळे बुधवारी क्षेत्रीय कार्यालयांच्या ठिकाणी अर्ज छाननीच्या वेळी या फाॅर्मवरून गोंधळ झाला. तसेच, ज्या पक्षाचे दोन फाॅर्म आले आहेत, त्या ठिकाणी पक्षाचे पत्र नसल्याने प्रशासनाने तूर्तास असे अर्ज वैध ठरवले असून, एबी फाॅर्मच्या वेळा तपासून उमेदवारी अंतिम करण्याच्या दिवशी पक्षाच्या अधिकृत उमेदवारांची नावे निश्चित केली जाणार आहेत. उशिरापर्यंत छाननी बुधवारी क्षेत्रीय कार्यालयात अर्जांच्या छाननी वेळी अनेक प्रमुख उमेदवारांच्या कागदपत्रांवर आक्षेप घेण्यात आले. त्यात प्रभाग ७ मधील भाजपच्या उमेदवार रेश्मा भोसले यांच्या मिळकत कराच्या ना हरकत प्रमाणावर आक्षेप घेतला. प्रभाग २२ मधील काॅग्रेसचे उमेदवार अविनाश बागवे यांच्या प्रतिज्ञापत्र तसेच विवाह नोंदणीच्या कागदपत्रांवर आक्षेप घेतला, तर प्रभाग २ मध्ये माजी उपमहापौर डाॅ. सिद्धार्थ धेंडे यांच्या पत्नीच्या कागदपत्रांवर आक्षेप घेण्यात आला. प्रभाग २७ मध्ये राष्ट्रवादीचे शहराध्यक्ष सुभाष जगताप उमेदवार धनंजय जाधव यांच्या कागदपत्रांवरही आक्षेप घेतला. त्याची सुनावणी रात्रीउशीरापर्यंत चालली होती.
