प्रभात वृत्तसेवा पुणे – भाजपसह अन्य पक्षांच्या उमेदवारांची यादी उद्या, सोमवारी जाहीर केली जाणार असून, उमेदवारांना कागदपत्रे तयार ठेवा असे निरोप देण्यात आले आहेत.काहीजणांचे अर्ज पक्षाने आधीच भरून ठेवले आहेत.अर्ज दाखल करण्याची मुदत आता दोनच दिवस राहिली असून, इच्छुकांची उत्कंठा शिगेला पोहोचली आहे. अद्याप एकाही प्रमुख पक्षांची यादी अद्याप जाहीर झाली नाही. इच्छुक नाराज होऊ नयेत तसेच अन्य पक्षात जाऊ नयेत यासाठी ही खबरदारी प्रत्येक पक्षाने घेतलेली दिसते.असे असले तरी अनेक उमेदवारांना अर्ज तयार ठेवण्याचे निरोप पक्षातून गेले आहेत. त्यामुळे तिकिट मिळालेल्या उमेदवारांनी ‘तेरी भी चूप, मेरी भी चूप’ ही भूमिका घेतली आहे. भाजप, काॅंग्रेस, दोन्ही राष्ट्रवादी, शिवसेना आदी सगळे पक्ष सोमवारीच आपली यादी जाहीर करतील. त्यामुळे सोमवारचा दिवस हा अर्ज दाखल करण्याच्या धामधुमीत जाणार हे स्पष्ट आहे.राष्ट्रवादी काॅंगेस (शप) पक्षाच्यावतीने रविवारीअर्ज भरण्यासाठी काही तज्ज्ञ तसेच वकिल यांची सुविधा उपलब्ध करून दिली होती. या ठिकाणी इच्छुकांनी अर्जावर कोठेही रिकामी जागा ठेवू नये , प्रत्येक उमेदवाराने खर्च करण्यासाठी वेगळे अकाउंट काढून त्यातूनच सर्व खर्च खरावा. सर्व आवश्यक कागदपत्रे त्वरीत तयार ठेवावीत असे त्यांना सांगण्यात आले. खर्चाची मर्यादा पुणे पालिका निवडणुकीसाठी १५ लाख आहे. त्याचे योग्य नियोजन कसे करावे, सर्व कागपत्रे ३० तारखेला दुपारीच दाखल करावीत आदी सूचना देण्यात आल्या. सुमारे ८५ इच्छुकांनी आपापले अर्ज तपासून घेतले. सोमवारी सकाळी १० ते सायं पाच वाजेपर्यत ही सुविधा उपलब्ध असणार आहे.
