प्रभात वृत्तसेवा पुणे : महापालिका निवडणुकीसाठी कोणत्याही पक्षाची यादी जाहीर झाली नसली तरी ज्यांना उमेदवारी निश्चित असल्याचा शब्द मिळाला आहे अशा भाजप, काॅग्रेस, राष्ट्रवादीच्या इच्छुकांनी पक्षाच्या नावाने उमेदवारी अर्ज दाखल केली आहे. खबरदारी म्हणून त्यांनी अपक्ष म्हणूनही अर्ज भरले आहेत. अर्ज भरण्यास दोन दिवस उरल्याने इच्छुकांनी ही खबरदारी घेतली आहे. आतापर्यंत निवडणूक विभागाकडे एकूण ३८ अर्ज आल्याची माहिती माहिती निवडणूक विभाग प्रमुख प्रसाद काटकर यांनी दिली.अर्ज भरण्यास २३ ते ३० डिसेंबर ही मुदत असून आतापर्यंत १० हजार ३०७ अर्ज घेतले आहेत. मागील चार दिवसात केवळ ३८ अर्ज दाखल झाले आहेत. राजकीय पक्ष बंडखोरी रोखण्यासाठी याद्या जाहीर करत नाहीत. महाविकास आघाडी आणि महायुतीच्या चर्चेतून जागा वाटपाचा अंतीम निर्णय होत नसल्याने याद्या जाहीर झालेल्या नाहीत. रविवारी अर्ज स्विकारणे बंद असून सोमवार, मंगळवार दोनच दिवस अर्ज भरण्यास आहेत. त्यामुळे काहीजणांनी अर्ज दाखल केले आहेत. उद्या, रविवारी याद्या जाहीर होणार असल्याने सोमवारपासून उमेदवारी अर्जांची संख्या लक्षणीय वाढण्याची शक्यता आहे. दाखल अर्ज शनिवारी ३८ अर्ज दाखल झाले. त्यामध्ये नगर रोड–वडगाव शेरी १३, कै. बा. स. ढोले पाटील रोड ५, कसबा–विश्रामबाग वाडा ४, शिवाजीनगर–घोले रोड ४, येरवडा–कळस–धानोरी २, नगर रोड–वडगाव शेरी १, धनकवडी–सहकारनगर १, कोथरूड–बावधन २, कोंढवा–येवलेवाडी २, वारजे–कर्वेनगर १, भवानी पेठ १, बिबवेवाडी १ आणि हडपसर १ असे अर्ज दाखल झाले.
