प्रभात वृत्तसेवा पुणे – युतीत शिवसेना मागते २५ जागा, मात्र भाजपकडून मिळतात १५ जागा. त्यातही भाजपने सेनेतील पदाधिकाऱ्यांच्याच प्रभागात उमेदवारीला कात्री मारली आहे. याचे पडसाद शनिवारी रामी ग्रँडमधील शिवसेनेच्या बैठकीत उमटले. हक्काच्या जागा मिळत नाही, कोणीही येते आणि आमच्यात लुडबुड करते, या शब्दात पदाधिकारी, नेत्यांमध्ये बाचाबाची झाली. तासांत संपणारी चर्चा दिवसभर खोळंबली. अखेर सायंकाळी चर्चेला पुर्णविराम देत जागावाटपाचा अहवाल आणि युतीचा निर्णय पक्षप्रमुखांच्या कोर्टात पाठवला. उद्या, रविवारी (दि. २८) दुपारपर्यंत युतीचा निर्णय शिवसेना घेण्याची शक्यता आहे.महापालिका निवडणुकीत शिवसेनेने भाजपला ३५ जागांचा प्रस्ताव पाठविला. त्यानंतर पुणे, मुंबईत बैठकाही झाल्या. मात्र, भाजपा १५ जागावरून हलायला तयार नाही. यामुळे शिवसेना नेते, पदाधिकाऱ्यांनी उपमुख्यमंत्री एकनाथ शिंदे यांच्याकडे किमान २५ ते ३० जागा मिळाव्या अशी मागणी केली.राज्य पातळीवर भाजप-शिवसेना बैठकीतील चर्चेनंतर शिवसेनेने २५ जागांची यादी पुण्याकडे पाठविली. त्यामध्ये पुणे पदाधिकाऱ्यांनी जे प्रभाग सांगितले, त्यातील काही प्रभागांचा समावेश नसल्याचे कळते. यामुळे नेते, पदाधिकाऱ्यांत बाचाबाचीही झाली. त्यावेळी नेत्यांनी पदाधिकाऱ्यांची समजूत काढली. मात्र, पदाधिकारी ऐकण्याच्या परिस्थितीत नसल्यामुळे चर्चा लांबली. परिणामी दुपारनंतर एक-एक पदाधिकारी बैठकीतून बाहेर पडले. त्यामुळे जागावाटपाचा तिढा सुटता सुटेना आणि युतीचे गणितही फिसकटणार असे दिसते. शिवसेनेची जेथे ताकद आहे, तेथेच भाजपने जागा सोडलेली नाही. त्यामुळे माजी आमदार रविंद्र धंगेकर यांना बाजूच्या प्रभागात निवडणूक लढवावी लागणार आहे. शहरप्रमुख नाना भानगीरे यांच्या प्रभागातही त्यांनी सुचविलेल्या उमेदवारांना वगळून इतरांना संधी मिळत असल्याने भानगिरे आणि विजय शिवतारे यांच्यात शाब्दीक बाचाबाच झाल्याचे समजते. त्यावेळी नेत्यांनी मध्यस्थी करत समजूत काढण्याचा प्रयत्नही केला. मात्र, भानगिरे चर्चा सोडून बाहेर पडले. तसेच नव्याने प्रवेश केलेल्या इच्छुकांनाही समाधानकारक जागा मिळत नसल्यामुळे नाराजी पसरली आहे.
