Investment In National Savings Certificates : पंतप्रधान नरेंद्र मोदीही गुंतवणुकीच्या बाबतीत मागे नाहीत. वाराणसीतून लोकसभा निवडणूक लढवण्यासाठी त्यांनी मंगळवारी अर्ज दाखल केला होता. यामध्ये त्यांनी प्रतिज्ञापत्राद्वारे आपली संपत्ती जाहीर केली. प्रतिज्ञापत्रानुसार, पीएम मोदींकडे एकूण 3.02 कोटी रुपयांची संपत्ती आहे. त्यांची 2.86 कोटी रुपयांची एफडीही असल्याचे सांगण्यात आले आहे. तसेच 9.12 लाख रुपये NSC (National Savings Certificates) मध्ये गुंतवले आहेत. NSC मध्ये गुंतवणूक करणे अधिक चांगले मानले जाते.

NSC म्हणजे काय ?

बरेच लोक राष्ट्रीय बचत प्रमाणपत्र म्हणजेच NSC मध्ये गुंतवणूक करतात. ही सरकारी योजना आहे. तुम्ही कोणत्याही पोस्ट ऑफिसमधून या योजनेचा लाभ घेऊ शकता. ही कमी जोखमीची योजना आहे. या योजनेत 5 वर्षांचा लॉक-इन कालावधी आहे, म्हणजेच एकदा पैसे गुंतवले की, तुम्ही ते 5 वर्षे काढू शकत नाही. 10 वर्षांपेक्षा जास्त वय असलेला कोणताही भारतीय या योजनेत गुंतवणूक करू शकतो.

FD पेक्षा जास्त परतावा मिळतो –

या योजनेचा सर्वात मोठा फायदा हा आहे की ती सध्या FD पेक्षा जास्त वार्षिक व्याज देत आहे. सध्या, 7.7 टक्के दराने व्याज दिले जात आहे, जे कोणत्याही बँकेच्या (ज्येष्ठ नागरिक वगळता) 5 वर्षांच्या एफडी व्याजदरापेक्षा जास्त आहे. FD मधील साधा व्याज दर 7.7 टक्क्यांपेक्षा कमी आहे. तुम्ही NSC मध्ये किमान 1000 रुपयां सह गुंतवणूक सुरू करू शकता. यासाठी कमाल मर्यादा नाही.

कर सूट उपलब्ध –

NSC मध्ये गुंतवणूक केल्याने तुम्हाला आयकरात सूटही मिळू शकते. आयकराच्या कलम 80C अंतर्गत, तुम्ही वार्षिक 1.50 लाख रुपयांच्या कमाल कर सूटचा दावा करू शकता. तर, 5 वर्षांची मॅच्युरिटी पूर्ण झाल्यावर जी काही रक्कम मिळेल, ती पूर्णपणे TDS मुक्त आहे.

हे लोक या योजनेत गुंतवणूक करू शकत नाहीत –

-हिंदू अविभक्त कुटुंब (HUFs)
-ट्रस्ट
-खाजगी आणि सार्वजनिक मर्यादित कंपन्या
-अनिवासी भारतीय