Tax Saving Tips: आर्थिक वर्ष 2024-25 आता संपण्याच्या मार्गावर आहे. अशा वेळी करदाते असे गुंतवणुकीचे पर्याय शोधत आहेत जे नव्या वित्त वर्षात चांगला परतावा देतील आणि टॅक्स वाचवण्यातही मदत करतील. आम्ही तुम्हाला पाच उत्तम गुंतवणूक योजनांबद्दल सांगणार आहोत, ज्या तुम्हाला जबरदस्त रिटर्न्स देतील आणि टॅक्स बचतीचाही लाभ मिळवून देतील.

पब्लिक प्रोव्हिडंट फंड (PPF) –

PPF ही एक सुरक्षित आणि दीर्घकालीन सरकारी बचत योजना आहे. जोखीम नको असणाऱ्यांसाठी ही योजना उत्तम आहे. यात 15 वर्षांचा लॉक-इन कालावधी आहे. कलम 80C अंतर्गत ₹1.5 लाखांपर्यंत टॅक्स सवलत मिळते. सध्या याचं व्याजदर वार्षिक 7.1% आहे. या गुंतवणुकीवर मिळणारं व्याज आणि परिपक्वता रक्कम पूर्णपणे करमुक्त आहे.

इक्विटी लिंक्ड सेव्हिंग्ज स्कीम (ELSS) –

ELSS ही म्युच्युअल फंडाची योजना आहे, जी बहुतांश रक्कम शेअर बाजारात गुंतवते. यात तीन वर्षांचा लॉक-इन कालावधी आहे आणि कलम 80C अंतर्गत ₹1.5 लाखांपर्यंत टॅक्स सवलत मिळते. बाजारातील चढ-उतारांमुळे ही योजना जोखीम घेण्यास तयार असणाऱ्यांसाठी योग्य आहे, ज्यांना फक्त टॅक्स वाचवायचं नाही तर मोठा परतावाही हवा आहे.

नॅशनल पेन्शन स्कीम (NPS) –

NPS ही निवृत्तीसाठी बचत करण्याचा उत्तम पर्याय आहे. सरकारी आणि खासगी क्षेत्रातील कर्मचारी दोघेही यात गुंतवणूक करू शकतात. कलम 80C अंतर्गत ₹1.5 लाख आणि 80CCD(1B) अंतर्गत अतिरिक्त ₹50,000 ची टॅक्स सवलत मिळते. निवृत्ती नियोजनासाठी ही योजना शानदार आहे आणि टॅक्स फायदाही चांगला मिळतो.

सीनियर सिटिझन्स सेव्हिंग्ज स्कीम (SCSS) –

60 वर्षांवरील व्यक्तींसाठी खास तयार केलेली SCSS योजना सुमारे 8.2% वार्षिक रिटर्न देते. यात पाच वर्षांचा लॉक-इन कालावधी आहे. यात जास्तीत जास्त ₹30 लाखांपर्यंत गुंतवणूक करता येते. कलम 80C अंतर्गत टॅक्स सवलत मिळते. सुरक्षित गुंतवणूक आणि चांगला परतावा हवा असणाऱ्या ज्येष्ठ नागरिकांसाठी हा उत्तम पर्याय आहे.

नॅशनल सेव्हिंग्ज सर्टिफिकेट (NSC) –

NSC ही सरकारी हमी असलेली योजना आहे, जी सुमारे 7.7% निश्चित व्याजदर देते. यात पाच वर्षांचा लॉक-इन कालावधी आहे आणि कलम 80C अंतर्गत ₹1.5 लाखांपर्यंत टॅक्स सवलत मिळते. जोखीम नको असणाऱ्यांसाठी आणि सुरक्षित रिटर्न हवे असणाऱ्यांसाठी ही योजना योग्य आहे.

या सर्व योजना तुम्हाला टॅक्स वाचवण्यासोबतच दीर्घकाळ आर्थिकदृष्ट्या सक्षम बनवतील. जर तुम्हाला टॅक्स बचतीबरोबर चांगला परतावा हवा असेल, तर या योजनांपैकी कोणत्याही एकात गुंतवणूक करू शकता.