नवी दिल्ली: देशातील लोकप्रतिनिधींच्या आर्थिक स्थितीवर प्रकाश टाकणारा ‘असोसिएशन फॉर डेमोक्रेटिक रिफॉर्म्स’ (ADR) आणि ‘नॅशनल इलेक्शन वॉच’ यांचा ताजा अहवाल प्रसिद्ध झाला आहे. २०१४ ते २०२४ या १० वर्षांच्या कालावधीत पुन्हा निवडून आलेल्या १०२ खासदारांच्या प्रतिज्ञापत्रांचे विश्लेषण यात करण्यात आले आहे. या अहवालात पंतप्रधान नरेंद्र मोदी आणि विरोधी पक्षनेते राहुल गांधी यांच्यासह महाराष्ट्रातील बड्या नेत्यांच्या संपत्तीचा सविस्तर तपशील देण्यात आला आहे.

मोदी आणि राहुल गांधींच्या संपत्तीत मोठी वाढ
अहवालानुसार, पंतप्रधान नरेंद्र मोदी यांची संपत्ती २०१४ मध्ये १६.५९ कोटी रुपये होती, जी २०१९ मध्ये २५.१३ कोटी आणि २०२४ मध्ये ३०.२० कोटी रुपयांवर पोहोचली आहे. गेल्या १० वर्षांत त्यांच्या संपत्तीत ८२ टक्क्यांची वाढ झाली आहे.

दुसरीकडे, राहुल गांधी यांची संपत्ती २०१४ मध्ये ९.४० कोटी रुपये होती. २०१९ मध्ये ती १५.८८ कोटी झाली आणि २०२४ च्या प्रतिज्ञापत्रानुसार ती २०.३९ कोटी रुपये आहे. त्यांच्या संपत्तीत ११७ टक्क्यांची वाढ नोंदवण्यात आली आहे.

साताऱ्याचे उदयनराजे भोसले अव्वल –
महाराष्ट्राच्या राजकारणातून एक महत्त्वाची बाब समोर आली आहे. साताऱ्याचे भाजप खासदार उदयनराजे भोसले यांच्या संपत्तीत सर्वाधिक वाढ झाल्याचे अहवालात म्हटले आहे. २०१४ मध्ये त्यांची संपत्ती ६० कोटी रुपये होती, जी २०१९ मध्ये १९९ कोटी आणि २०२४ मध्ये तब्बल २२४ कोटी रुपयांवर गेली आहे.

चित्रपटसृष्टीतील खासदारांचीही ‘चांदी’

हेमा मालिनी (भाजप): २०१४ मध्ये १७८ कोटी असणारी संपत्ती २०२४ मध्ये २७८ कोटी झाली आहे (१०० कोटींची वाढ).

शत्रुघ्न सिन्हा (TMC): २०१४ मध्ये १३१ कोटी असणारी संपत्ती २०२४ मध्ये २१० कोटी रुपयांवर पोहोचली आहे.

सुप्रिया सुळे आणि निशिकांत दुबे यांच्या संपत्तीतही वाढ
महाराष्ट्रातील ज्येष्ठ नेत्या आणि राष्ट्रवादी काँग्रेस (शरद पवार गट) खासदार सुप्रिया सुळे यांची संपत्ती २०१४ मध्ये ११३ कोटी होती, जी आता १६६ कोटी झाली आहे. भाजपचे निशिकांत दुबे यांची संपत्ती १५ कोटींवरून ७४ कोटींवर पोहोचली आहे. तर गुजरातच्या पूनमबेन माडम यांच्या संपत्तीत सर्वाधिक ७४७ टक्के वाढ झाली आहे.

अपवाद: सी. आर. पाटील यांची संपत्ती घटली
जिथे बहुतांश खासदारांच्या संपत्तीत वाढ झाली आहे, तिथे भाजप खासदार सी. आर. पाटील यांच्या संपत्तीत घट पाहायला मिळाली आहे. २०१४ मध्ये त्यांची संपत्ती ७४ कोटी होती, जी २०२४ मध्ये ३९ कोटी रुपयांवर आली आहे. त्यांच्या संपत्तीत साधारण ४७ टक्क्यांची घट झाली आहे.