PM Modi in Seychelles: पंतप्रधान नरेंद्र मोदी यांनी आपल्या तीन दिवसीय दौऱ्यादरम्यान रविवारी सेशेल्सच्या राष्ट्रीय सभेला संबोधित करताना, भारत आणि सेशेल्स यांच्यातील शतकानुशतके जुन्या सांस्कृतिक आणि ऐतिहासिक संबंधांना नव्या उंचीवर नेले.

यावेलो बोलताना पंतप्रधानांनी, “दोन्ही देशांमधील संबंध केवळ राजनैतिक नसून ते सामायिक वारसा, संस्कृती आणि लोकांच्या परस्पर संबंधांवर आधारित आहेत.” असे म्हटले. त्यासोबतच पंतप्रधान मोदींनी चटणी, समोसे आणि पारंपरिक सणांचा उल्लेख करून दोन्ही देशांमधील सांस्कृतिक जवळीक अधोरेखित केली.

 

दोन्ही देशांची ओळख त्यांच्या सामायिक संस्कृतीतून प्रतिबिंबित   (PM Modi in Seychelles)

पंतप्रधान म्हणाले की, सेशेल्सची सर्वात मोठी ताकद तेथील लोकांमध्ये आहे. त्यांनी स्पष्ट केले की, गेल्या अनेक वर्षांपासून जगाच्या विविध भागांतील लोक येथे स्थायिक झाले आहेत आणि त्यांनी आपल्यासोबत त्यांच्या भाषा, परंपरा आणि संस्कृती आणल्या आहेत. या विविधतेने मिळून सेशेल्ससाठी एक सामायिक ओळख निर्माण केली आहे, ज्याचा तेथील लोकांना अभिमान आहे.

चटणी, समोसे आणि सण ही मैत्रीची उदाहरणे आहेत   (PM Modi in Seychelles)

राष्ट्रीय सभेच्या ‘विविधतेत एकता’ या ब्रीदवाक्याचा संदर्भ देत पंतप्रधान मोदी म्हणाले की, भारत आणि सेशेल्समधील सांस्कृतिक संबंध दैनंदिन जीवनात स्पष्टपणे दिसून येतात.

ते म्हणाले की, करी कोको, समोसे आणि चटणीच्या चवींपासून ते दिवाळी, थाई पोंगल आणि नवरात्रीतील गरबा यांसारख्या कार्यक्रमांपर्यंत, दोन्ही देशांचा सामायिक सांस्कृतिक वारसा दिसून येतो. त्यांनी विश्वास व्यक्त केला की, या सांस्कृतिक संबंधांमुळे भविष्यात दोन्ही देशांमधील मैत्री अधिक दृढ होईल.

राजनैतिक संबंधांची ५० वर्षे, आपुलकीची अडीचशे वर्षे

पंतप्रधानांनी नमूद केले की, यावर्षी भारत आणि सेशेल्स यांच्यातील राजनैतिक संबंधांच्या स्थापनेला ५० वर्षे पूर्ण होत आहेत. तथापि, दोन्ही देशांतील लोकांचे संबंध याहूनही खूप पूर्वीचे आहेत.

ते म्हणाले की, ही मैत्री अडीचशे वर्षांहून अधिक काळ टिकून आहे आणि जगात अशी फार कमी नाती आहेत ज्यांचा पाया इतका मजबूत, विश्वासपूर्ण आणि जिव्हाळ्याचा आहे.

भारत नेहमीच सेशेल्सच्या पाठीशी उभा राहील   (PM Modi in Seychelles)

पंतप्रधान मोदींनी आश्वासन दिले की भारत सेशेल्सचा एक विश्वासार्ह भागीदार राहील. ते म्हणाले की, भारत केवळ सेशेल्सच्या यशाचा उत्सव साजरा करणार नाही, तर त्याच्या विकासाच्या प्रवासाच्या आणि आकांक्षांच्या प्रत्येक टप्प्यावर त्याच्या पाठीशी उभा राहील. त्यांनी विश्वास व्यक्त केला की दोन्ही देशांमधील भागीदारीचा सर्वोत्तम टप्पा अजून यायचा आहे.

सेशेल्समध्ये भारतीय समुदाय महत्त्वाची भूमिका बजावतो

परराष्ट्र मंत्रालयाच्या माहितीनुसार, भारत आणि सेशेल्समधील संबंध १७७० पासूनचे आहेत, जेव्हा पाच भारतीय प्रथम या बेट राष्ट्रात आले होते. सध्या, सेशेल्सची लोकसंख्या अंदाजे १,२०,००० आहे, त्यापैकी सुमारे ५,००० भारतीय वंशाचे आहेत. भारतीय समुदाय देशाच्या सामाजिक, आर्थिक आणि सांस्कृतिक जीवनात महत्त्वपूर्ण योगदान देत आहे.