पुणे – शहरात मेट्रोसेवा सुरू झाली याला प्रवाशांकडून प्रतिसादही चांगला मिळत आहे. परंतु, पुणेकरांसाठी सार्वजनिक वाहतुकीची जीवनदायिनी ठरलेल्या दोन हजार इलेक्‍ट्रिक बसेसची योजना गेल्या दोन वर्षांपासून रखडली आहे. याच कारणातून अद्यापही काही मार्गांवर फेऱ्या नसणे तसेच कमी फेऱ्या असणे, थेट सेवा नसणे अशा समस्यांना पीएमपीच्या प्रवाशांना सामोरे जावे लागत आहे.

पुणे महानगर परिवहन महामंडळ लिमिटेड (पीएमपीएमएल), पुणे महापालिका आणि पिंपरी-चिंचवड महापालिका प्रशासनाकडून हा प्रकल्प मार्गी लागणे गरजेचे होते. परंतु, याची अंमलबजावणीच होत नसल्याने याचा परिणाम प्रवासी सेवेवर होत आहे. बसेस कमी असल्याने बसमध्ये दररोजची प्रवाशांची गर्दी हटण्यापेक्षा ती अधिकच वाढत आहे. प्रवाशांना अपुऱ्या सार्वजनिक सोयीसुविधेसह प्रवास करावा लागत आहे.

महापालिका प्रशासनाकडून नागरिकांच्या फायद्यासाठी फीडर सेवा, बसेस आणि इतर वाहतूक पद्धतींमध्ये सुधारणा करण्याच्या कामांवर भर दिला जात असला तरी वस्तुस्थिती वेगळी आहे, पीएमपीएमएलने तत्काळ सुविधा देण्यासाठी कार्यवाही सुरू केली आणि या प्रस्तावित दोन हजार इलेक्‍ट्रिक बसेस ताफ्यात आणण्याचा प्रयत्न केला, तरीही या बसेस कार्यान्वित होण्यासाठी किमान एक वर्ष कालावधी लागणार आहे.