Piyush Goyal : बांगलादेशला ज्याप्रमाणे अमेरिकन कापूस आणि सुतापासून तयार केलेल्या कपड्यांवर सवलती मिळतात, तशाच प्रकारच्या सवलती अमेरिका आणि भारत यांच्यात होऊ घातलेल्या आगामी व्यापारी करारामुळे आता भारतालाही मिळणार असल्याची माहिती केंद्रीय वाणिज्य आणि उद्योग मंत्री पीयूष गोयल (Piyush Goyal) यांनी गुरुवारी दिली. भारत आणि अमेरिका यांच्यातील द्विपक्षीय व्यापार कराराच्या पहिल्या टप्प्याचा मसुदा अंतिम झाला असून, मार्च महिन्यात त्याची अंमलबजावणी होण्याची शक्यता आहे. या करारानुसार, जर भारतीय कंपन्यांनी अमेरिकेतून कापूस किंवा सुताची आयात करून त्यापासून तयार केलेले कपडे पुन्हा अमेरिकेला निर्यात केले, तर त्यावर कोणताही आयात कर (ड्यूटी) आकारला जाणार नाही. सध्या बांगलादेशला मिळणाऱ्या सवलतींच्या धर्तीवरच हा निर्णय घेण्यात आला आहे, अशी माहिती मंत्री पीयुष गोयल यांनी दिली. सध्याच्या नियमानुसार, अमेरिकेत बांगलादेशी कपड्यांवर ३१ टक्के इतका कर आकारला जातो. तो आता १९ टक्क्यांनी कमी होवुन थेट १२ टक्क्यांवर आणला आहे. परंतु जर अमेरिकन कापूस आणि मानवनिर्मित तंतूंपासून बनवलेले कपडे असतील त्यावर शून्य कर आकारला जातो. आता भारतालाही अशाच प्रकारचे ‘ड्यूटी-फ्री’ लाभ मिळणार असल्याने जागतिक बाजारपेठेत भारतीय कापड उद्योगाची स्पर्धात्मकता वाढणार आहे. या निर्णयामुळे भारतीय कापूस उत्पादक शेतकऱ्यांवर कोणताही विपरीत परिणाम होणार नाही, अशी ग्वाही देखील गोयल यांनी दिली. अमेरिकेचे कापूस उत्पादन मर्यादित असून त्यांची निर्यात फक्त ५० दशलक्ष अमेरिकन डॉलर्स एवठी आहे तर भारताचे निर्यातीचे उद्दिष्ट ५० अब्ज डॉलर्स इतके मोठे असल्याचे त्यांनी नमूद केले.
