मुलींच्या समस्या कायम, अंदाजपत्रकात फक्त घोषणा
साचा बांधकाम विभागाकडे, साहित्य आयटी विभागाकडेच अडकलेले
‘Pink Room’:  पुणे महापालिकेच्या शाळांमध्ये मुलींसाठी स्वतंत्र ‘पिंक रूम’ उभारण्याची घोषणा महापालिका आयुक्तांच्या २०२६-२७ या आर्थिक वर्षाच्या अंदाजपत्रकात करण्यात आली असली, तरी प्रत्यक्षात या सुविधेची अंमलबजावणी अद्याप झालेली नाही.

शहरातील ७५ मनपा शाळांमध्ये ‘विद्यावर्धिनी’ प्रकल्प राबविला जात असून, या शाळांमध्ये पिंक रूमसाठीचा साचा बांधकाम विभागाकडून तयार करून दिला जाणार आहे. तसेच, आवश्यक साहित्य आयटी विभागाकडून उपलब्ध करून दिले जाणार असल्याची माहिती प्रशासनाने दिली आहे.

मनपा शाळांमध्ये मुलींच्या मासिक पाळीच्या काळात त्यांना आवश्यक सुविधा, स्वच्छता आणि सुरक्षितता मिळावी, यासाठी पिंक रूमची संकल्पना मांडण्यात आली होती.

मात्र, त्याची सद्यःस्थिती काय आहे, याबाबत प्रशासनाकडे विचारणा करण्यात आली असता, संबंधित काम अद्याप विविध विभागांच्या समन्वयाच्या टप्प्यात असून, त्याबाबत ना भवन रचना विभागाकडून काम करण्यात आले ना आयटी विभागाकडून परिणामी अंदाजपत्रक केवळ घोषणांपुरतेच राहत असल्याचे चित्र आहे. तर, वयात येणाऱ्या मुलींसाठी हा महत्त्वाचा उपक्रम असतानाही प्रशासनाचे त्याकडे दुर्लक्ष असल्याचे वास्तव आहे.

घोषणेनंतर प्रत्यक्ष सुविधा कधी?
मुलींच्या आरोग्य व स्वच्छतेसाठी स्वतंत्र सुविधा उपलब्ध करून देण्याच्या घोषणा केल्या जात असताना, त्यांची प्रत्यक्ष अंमलबजावणी कधी होणार, हा प्रश्न आता उपस्थित झाला आहे. पिंक रूमसाठी साचा तयार करण्याची प्रक्रिया अद्याप सुरू असल्याने ७५ शाळांतील विद्यार्थिनींना या सुविधेसाठी आणखी किती काळ प्रतीक्षा करावी लागणार, याचे स्पष्ट उत्तर प्रशासनाकडून देण्यात आलेले नाही. तर अनेक क्षेत्रीय कार्यालयांकडून आपल्या हद्दीत महापालिकेच्या माध्यमिक व तांत्रिक शिक्षण विभागाची कोणतीही शाळा नाही. त्यामुळे पिंक रूमची अंमलबजावणी केली नसल्याचे सांगत या विषयात हात झटकले आहेत.