देहूगाव  : संत तुकोबांनी जगण्याचे तत्त्वज्ञान त्यांच्या अभंगाच्या माध्यमातून सोप्या भाषेत सांगितले. संतांचे विचार जनसामान्यांपर्यंत पोहोचविण्याचे लाखमोलाचे काम वारकरी संप्रदाय करत असून कीर्तनाच्या माध्यमातून समाज प्रबोधनाचे कामही वारकरी संप्रदाय करत आहे, असे गौरवोद्गार उपमुख्यमंत्री एकनाथ शिंदे यांनी काढले.

जगद्गुरु श्री संत तुकाराम महाराज त्रिशकोत्तर अमृत महोत्सवी 375 वा वर्षपूर्ती सांगता वैकुंठगमन सोहळ्यानिमित्त देहू येथे उपमुख्यमंत्री एकनाथ शिंदे यांना श्री संत तुकाराम महाराज संस्थानच्या वतीने जगद्गुरु श्री संत तुकाराम महाराज पुरस्कार प्रदान करण्यात आला. त्यावेळी आयोजित कार्यक्रमात ते बोलत होते. संस्थांनच्या वतीने संत तुकाराम महाराजांची पगडी, उपरणे, विना, टाळ, चिपळ्या, संत तुकाराम महाराजांची मूर्ती, गाथा, प्रदान करून एकनाथ शिंदे यांचा सन्मान करण्यात आला.

यावेळी खासदार श्रीरंग बारणे, आमदार विजय शिवतारे, शरद सोनवणे, विभागीय आयुक्त डॉ. चंद्रकांत पुलकुंडवार, संस्थानचे अध्यक्ष पुरुषोत्तम महाराज मोरे, आळंदी संस्थानचे विश्वस्त योगी निरंजन नाथ, भावार्थ देखणे तसेच मोठ्या संख्येने वारकरी उपस्थित होते. यावेळी उपमुख्यमंत्री एकनाथ शिंदे म्हणाले, वारकरी संप्रदायातील हा सर्वश्रेष्ठ पुरस्कार मला त्यांचा आशीर्वाद आणि प्रेरणादायी ठरेल .ज्ञानोबा- तुकोबांच्या जयघोषाने प्रेरणा मिळते. रंजल्या- गांजल्यांची सेवा करण्याचे बळ संत तुकारामांच्या अभंगातून मिळते. नुकताच अभिजात भाषेचा दर्जा प्राप्त झाल्याने मराठी भाषेचा अभिमान वाढला आहे. परंतु, तुकाराम महाराजांनी 400 वर्षांपूर्वीच क्लिष्ट तत्त्वज्ञान सर्वांना समजेल, अशा सोप्या मराठी भाषेत सांगितले.

निसर्गाचे रक्षण करणेही आपले कर्तव्य आहे. नद्यांच्या पुनरुज्जीवनासाठी ठोस प्रयत्न शासन करत आहे. नद्यांच्या प्रदूषण मुक्तीची चळवळ ही लोकचळवळ व्हावी, देशातील सर्वात आदर्श नद्या महाराष्ट्रात आहेत असा नावलौकिक करुया, असे आवाहन उपमुख्यमंत्री एकनाथ शिंदे यांनी केले.ते म्हणाले, तरुण पिढीसाठी संत तुकाराम यांची गाथा ई-बुक स्वरूपात उपलब्ध करुन देण्याचे काम मराठी भाषा विभागाच्या वतीने करण्यात येत असून लवकरच सर्व शाळांमध्ये हे ई-बुक उपलब्ध करुन देण्यात येणार असल्याचे उपमुख्यमंत्री शिंदे यांनी यावेळी व्यक्त केले.