पिंपरी – पिंपरी चिंचवड महापालिका निवडणुकीची आचारसंहिता लागू झाली आहे. निवडणुकीची घोषणा होताच उपमुख्यमंत्री अजित पवार यांनी भाजप, शिवसेना (उद्धव बाळासाहेब ठाकरे) पक्षाला पहिला धक्का दिला आहे. जाधवाडीतील भाजपच्या माजी नगरसेविका अश्विनी जाधव, शिवसेना ठाकरे पक्षाच्या महिला संघटिका रुपाली आल्हाट, शिवसेनेचे उपशहरप्रमुख नेताजी काशिद यांनी राष्ट्रवादी काँग्रेसमध्ये प्रवेश केला आहे. मंगळवारी (दि. १६) दिवसभर हा पक्षप्रवेशाचा सोहळा पुण्यातील बारामती हॉस्टेल येथे सुरू होता. यावेळी शहराध्यक्ष योगेश बहल, माजी आमदार विलास लांडे, निवडणूक प्रमुख नाना काटे, माजी नगरसेवक अजित गव्हाणे, वसंत बोराटे, यश साने, विकास साने, विशाल आहेर आदी उपस्थित होते. दुपारनंतर शिवसेनेचे माजी शहरप्रमुख ॲड. सचिन भोसले यांनी शिवसेनेच्या पदाधिकारी व कार्यकर्त्यांसोबत प्रवेश केला. भाजपच्या स्थायी समितीच्या माजी अध्यक्षा सीमा सावळे यांनी देखील राष्ट्रवादी काँग्रेसमध्ये प्रवेश केला. आक्रमक नगरसेविका अशी सावळे यांची ओळख आहे. त्या तीनवेळा महापालिका निवडणुकीमध्ये निवडून आल्या आहेत. भाजपच्या कार्यकाळात त्यांनी स्थायी समितीचे अध्यक्षपद भूषवले आहे. यासोबतच शिवसेनेचे तुषार सहाणे यांनी देखील राष्ट्रवादीमध्ये प्रवेश केला आहे. आचारसंहिता लागू होताच राष्ट्रवादीमध्ये भाजप आणि शिवसेनेतील सहा जणांनी प्रवेश केला आहे. महापालिकेवर प्रशासकराज असताना तब्बल साडेचार वर्षानंतर निवडणूक होत आहे. त्यासाठी सोमवारपासून (दि. १६) आचरसंहिता लागू झाली आहे. राज्यातील सत्तेत सहभागी असलेले भाजप आणि राष्ट्रवादी काँग्रेस पक्ष स्वबळावर निवडणूक लढवत आहेत. मुख्यमंत्री देवेंद्र फडणवीस यांनी स्वबळावर निवडणूक लढवणार असल्याचे जाहीर केल्यानंतर उपमुख्यमंत्री अजित पवार यांनी रणनिती आखण्यास सुरूवात केली आहे. महापालिकेत राष्ट्रवादीची सत्ता पुन्हा येण्यासाठी पवार यांनी डाव टाकले आहेत. आचारसंहिता लागू होताच त्यांनी शहरातील प्रमुख पदाधिकाऱ्यांची बैठक पुण्यात घेतली. –
