प्रभात वृत्तसेवा
पिंपरी – एका व्यक्तीने दारू पाजून आणि वाद घालून एका तरुणाला जिवे मारण्याच्या उद्देशाने नदीच्या पुलावरून खाली ढकलून दिले. ही घटना शनिवारी (दि. १३) रात्री ९:३० वाजताच्‍या सुमारास कुरूळी गावाच्या हद्दीत जुन्या इंद्रायणी नदीच्या पुलावर घडली.याबाबत सिद्धार्थ भानुदास बोडके (वय ३७, रा. मोशी) यांनी रविवारी (दि. १४) महाळुंगे एमआयडीसी पोलीस ठाण्यात फिर्याद दिली आहे.

त्यानुसार मोहन तुकाराम जाधव (वय ३४, रा. मोशी) याला अटक करण्यात आली आहे. पोलिसांनी दिलेल्या माहितीनुसार, आरोपीने फिर्यादीला दारू पिण्यासाठी बोलावले. त्याच्या रिक्षात बसवून त्याला हॉटेल तुळजा भवानी, मोशी येथे नेले आणि दारू पाजली. त्यानंतर त्याने फिर्यादीसोबत शिवीगाळ करत वाद घातला. वादाचे रूपांतर भांडणात झाल्यावर आरोपीने त्याला रिक्षात बसवून जुन्या इंद्रायणी नदीच्या पुलावर आणले. तिथे पुन्हा वाद घालून रिक्षातून बाहेर ओढले.

त्याने हाताने मारहाण केली आणि गाडीतील लोखंडी रॉड काढून मारू लागला. रॉडचा फटका फिर्यादीच्या डाव्या हाताच्या मनगटाजवळ लागला. त्यानंतर आरोपीने जिवे मारण्याच्या उद्देशाने फिर्यादीला उचलून पुलावरून इंद्रायणी नदीपात्रात फेकून दिले. महाळुंगे एमआयडीसी पोलीस याबाबत अधिक तपास करत आहेत.