Pimpri Chinchwad Police – हरवलेले १३० मोबाइल शोधून नागरिकांना दिलासा देत सांगवी पोलिसांनी उल्लेखनीय कामगिरी केली आहे. ते मोबाइल त्यांच्या मूळ मालकांना परत करण्यात आले. या उपक्रमामुळे मोबाइलधारकांच्या चेहऱ्यावर आनंद झळकला. सांगवी पोलीस ठाण्याचे वरिष्ठ निरीक्षक जितेंद्र कोळी, पोलीस निरीक्षक (गुन्हे) अमोल नांदेकर आणि पोलीस अंमलदार राजकुमार माने यांनी या मोहिमेत महत्त्वाची भूमिका बजावली. हा उपक्रम पोलीस आयुक्त विनयकुमार चौबे, सह आयुक्त डॉ. शशिकांत महावरकर आणि अपर आयुक्त बसरवराज तेली यांच्या मार्गदर्शनाखाली राबविण्यात आला. नागरिकांचे हरवलेले मोबाइल शोधण्यासाठी सीईआयआर (CEIR) पोर्टलचा वापर करून तांत्रिक तपास करण्यात आला. त्यानंतर विविध ठिकाणांहून हे मोबाइल शोधून काढण्यात यश आले. सुमारे १३० मोबाइलचा शोध घेऊन ते मूळ मालकांना सुपूर्द करण्यात आले. हे मोबाइल ७ मार्च रोजी सहाय्यक पोलीस आयुक्त सचिन हिरे (सांगवी विभाग) यांच्या हस्ते मोबाइल मालकांना परत करण्यात आले. आपले हरवलेले मोबाइल पुन्हा मिळाल्याने नागरिकांनी पोलिसांचे आभार मानले. मोबाइल मिळाल्यानंतर नागरिकांच्या चेहऱ्यावर उमटलेला आनंद हा पोलिसांसाठी प्रेरणादायी असल्याची भावना यावेळी व्यक्त करण्यात आली. सांगवी पोलिसांनी नागरिकांना मोबाइल हरवल्यास तात्काळ तक्रार नोंदवण्याचे आवाहन केले आहे. तसेच भविष्यातही अशाच प्रकारे हरवलेल्या वस्तू शोधून नागरिकांना मदत करण्यासाठी पोलिसांचे प्रयत्न सुरू राहतील, असेही सांगण्यात आले.
