Pimpri Chinchwad Police – विषारी दारुकांडामुळे झालेल्‍या मृत्‍यूनंतर आता पोलिसांनी अवैध दारु साखळी तोडण्यासाठी गांभिर्याने प्रयत्‍न सुरू केल्‍याचे दिसून येत आहे. पिंपरी-चिंचवड, पुणे शहर आणि पुणे ग्रामीण परिसरातील अवैध दारू धंद्यांचे समूळ उच्चाटन करण्यासाठी आता पोलीस आणि संबंधित यंत्रणांनी संयुक्‍त बैठक घेतली. अवैध हातभट्टी, भेसळयुक्त दारू आणि बेकायदेशीर दारू विक्रीच्या संपूर्ण साखळीतील प्रत्येक दुव्यावर थेट कारवाई करण्याचा निर्णय या बैठकीत घेण्यात आला.

​पिंपरी-चिंचवडचे पोलीस आयुक्त विनय कुमार चौबे यांच्या मार्गदर्शनाखाली ५ जून रोजी पिंपरी-चिंचवड पोलीस आयुक्तालयात या अत्यंत महत्त्वाच्या समन्वय बैठकीचे आयोजन करण्यात आले होते. ​​या बैठकीत प्रामुख्याने भेसळयुक्त दारू, अवैध दारू गाळणे आणि शहरासह ग्रामीण भागात पसरलेल्या अवैध दारू विक्रीच्या जाळ्या उद्ध्वस्त करण्यावर सविस्तर चर्चा झाली.

या तिन्ही क्षेत्रांतील वाढत्या गुन्हेगारीला चाप लावण्यासाठी गुप्त माहितीची आपापसात वेगवान देवाणघेवाण करणे आणि संयुक्तपणे कडक अंमलबजावणी अधिक मजबूत करण्यावर सर्व अधिकाऱ्यांनी एकमत केले. अवैध दारूच्या समूळ उच्चाटनासाठी आयोजित या हायव्होल्टेज बैठकीला प्रशासनातील पोलीस सह आयुक्त डॉ. शशिकांत महावरकर, अपर आयुक्त सारंग आवाड, बसवराज तेली, ​

पुणे ग्रामीणचे पोलीस अधीक्षक संदीप सिंह गिल, ​राज्य उत्पादन शुल्क विभाग (पुणे) चे अधीक्षक अतुल कानडे आणि गिरीष हुकरे, ​अन्न व औषध प्रशासन विभाग (पुणे) चे सह आयुक्त चिलूमुल्ला रजनीकांत, पोलीस उपायुक्त रोहिदास पवार ​या सर्व विभागांच्या संयुक्त पुढाकारामुळे आगामी काळात पिंपरी-चिंचवडसह संपूर्ण पुणे जिल्ह्यात अवैध दारू विक्रेते आणि हातभट्ट्यांवर मोठ्या कारवायांची मालिका पाहायला मिळण्याची शक्यता आहे.