Pimpri Chinchwad News – पिंपरी-चिंचवड शहरात पर्यावरण प्रकल्पाच्या निमित्ताने नव्या राजकीय वादाला तोंड फुटले आहे. शहराचे महापौर रवी लांडगे यांनी पर्यावरण मंत्री पंकजा मुंडे यांची भेट घेऊन दुर्गादेवी टेकडी येथील सुमारे ८५ एकर जागेत स्वर्गीय गोपीनाथ मुंडे ऑक्सिजन पार्क उभारण्याचा प्रस्ताव सादर केला आहे. दिवंगत नेते गोपीनाथ मुंडे यांच्या स्मरणार्थ हा आंतरराष्ट्रीय दर्जाचा हरित प्रकल्प उभारण्याचा मानस व्यक्त करण्यात आला आहे. मात्र, या प्रस्तावामुळे शहरात नामांतराच्या राजकारणाची चर्चा पुन्हा रंगली आहे. दुर्गादेवी टेकडीवरील विद्यमान उद्यानाला आधीच माजी पंतप्रधान इंदिरा गांधी यांचे नाव देण्यात आले आहे. त्यामुळे नवीन प्रकल्प राबविताना विद्यमान नाव बदलले जाणार का?, हा प्रश्न उपस्थित झाला आहे. पर्यावरणाच्या नावाखाली काँग्रेसकालीन प्रतीक हटवून भाजपशी संबंधित नाव पुढे आणण्याचा प्रयत्न होत असल्याचा आरोप यानिमित्ताने करण्यात येत आहे. महापौरांनी मात्र शहराच्या हरित विकासाला चालना देणे आणि नागरिकांना शुद्ध हवा उपलब्ध करून देणे हा मुख्य उद्देश असल्याचे स्पष्ट केले आहे. गेल्या काही वर्षांत देशभरात नामांतराचे निर्णय चर्चेत राहिले आहेत. प्रयागराज (अलाहाबाद), छत्रपती संभाजीनगर (औरंगाबाद) यांसारख्या शहरांच्या नावांमध्ये बदल करण्यात आले. तसेच प्रधानमंत्री आवास योजना (पूर्वी इंदिरा आवास योजना) हेही उदाहरण दिले जाते. केंद्रात नरेंद्र मोदी आणि राज्यात देवेंद्र फडणवीस यांच्या कार्यकाळात अशा निर्णयांमुळे राजकीय चर्चा रंगल्या होत्या. दरम्यान, शहरात सुमारे २०३ उद्याने असताना विद्यमान उद्यानाचे नामांतर करूनच ‘ऑक्सिजन पार्क’ उभारण्याची गरज काय, असा सवाल नागरिकांकडून केला जात आहे. पर्यावरणपूरक प्रकल्प, जैविक शेतीला प्रोत्साहन आणि इंद्रायणी नदी प्रदूषणाविरोधात कठोर उपाययोजना करण्याची आवश्यकता असून नामांतर करून काय साध्य होणार असा सवाल नागरिकांकडून उपस्थित केला जात आहे. “दुर्गादेवी टेकडीवर ८५ एकर जागा आहे. हा संपूर्ण परिसर ऑक्सिजन पार्क म्हणून विकसित केला जाणार आहे. त्यातील दहा एकरच्या एका प्रकल्पाला स्वर्गीय गोपीनाथ मुंडे यांचे नाव देण्यात येणार आहे. पूर्वीचे नाव बदलले जाणार नाही.” – रवी लांडगे, महापौर.
