Pimpri Chinchwad News – पिंपरी-चिंचवड शहरात रूफटॉप हॉटेल्सची संख्या वाढत असताना महापालिकेच्या सर्वेक्षणात मात्र फक्त सातच रूफटॉप हॉटेल्स आढळल्याचा अहवाल समोर आला आहे. त्यामुळे महापालिकेने केलेल्या सर्वेक्षणाच्या अचूकतेवरच प्रश्नचिन्ह निर्माण झाले आहे. विशेष म्हणजे, याच प्रशासनाने २०२३ मध्ये केलेल्या सर्वेक्षणात तब्बल ४९ रूफटॉप हॉटेल्स आढळली होती.

तीन वर्षांत हॉटेल्सची संख्या ४९ वरून सातवर आली की महापालिकेच्या सर्वेक्षणाची नजरच कमी झाली, असा सवाल आता उपस्थित होत आहे. शहरातील वाकड, पिंपळे सौदागर, पिंपळे गुरव, चिंचवड, निगडी-प्राधिकरण, स्पाइन रोड, भोसरी यांसह विविध भागांत इमारतींच्या गच्च्यांवर हॉटेल्स, रेस्टॉरंट आणि पार्टी स्पेस सुरू असल्याचे चित्र आहे.

पिंपळे सौदागर सारख्या उच्चभ्रू भागात एकाच रस्त्यावर सात रुफटॉप हॉटेल्स आहेत. रात्रीच्या वेळी अशा ठिकाणी मोठ्या प्रमाणात गर्दीही दिसून येते. मात्र, महापालिकेच्या बांधकाम परवानगी व अनधिकृत बांधकाम निर्मूलन विभागाच्या सर्वेक्षणात शहरभर केवळ सातच रूफटॉप हॉटेल्स सापडल्याचे सांगण्यात आले आहे.

महापालिकेच्या अतिक्रमण निर्मूलन विभागाने २०२३ मध्ये शहरातील रूफटॉप हॉटेल्सचे सर्वेक्षण केले होते. त्यावेळी ४९ रूफटॉप हॉटेल्स आढळली होती. त्यापैकी अनेक हॉटेल्स कोणतीही आवश्यक परवानगी न घेता सुरू असल्याचे समोर आले होते. महापालिकेने संबंधितांना नोटीस बजावल्या होत्या, तर पूर्णतः अनधिकृत असलेल्या नऊ हॉटेल्सवर कारवाईही केली होती.

मात्र, आता नव्याने केलेल्या सर्वेक्षणात ही संख्या तब्बल ४९ वरून सातवर आली आहे. त्यामुळे उर्वरित ४२ रूफटॉप हॉटेल्स नेमकी गेली कुठे? ती बंद झाली की त्यांचे रूपांतर अन्य व्यवसायांत झाले, की सर्वेक्षणाच्या रडारवरच आलीच नाहीत, असा प्रश्न उपस्थित होत आहे.

सर्वेक्षणात संशय?
शहरातील विविध भागांत गच्च्यांवर सुरू असलेले हॉटेल व्यवसाय, सजावट, किचन, आसनव्यवस्था आणि रात्री उशिरापर्यंत सुरू असलेली गर्दी नागरिकांच्या नजरेस पडत असताना प्रशासनाच्या सर्वेक्षणात मात्र केवळ सात हॉटेल्स आढळल्याने आश्चर्य व्यक्त होत आहे. रूफटॉप हॉटेल्समध्ये मोठ्या प्रमाणात ग्राहकांची गर्दी होत असते.

अशा ठिकाणी स्वयंपाकगृह, गॅस सिलिंडर, विद्युत उपकरणे आणि सजावटीसाठी विविध साहित्य वापरले जाते. आग लागल्यास किंवा अन्य दुर्घटना घडल्यास नागरिकांच्या सुरक्षिततेचा प्रश्न गंभीर बनू शकतो. त्यामुळे सर्वेक्षण केवळ कागदावर न करता प्रत्यक्ष शहराच्या प्रत्येक भागात जाऊन करणे अपेक्षित आहे.

“अनधिकृत बांधकाम व अतिक्रमण निर्मूलन विभागातील अधिकाऱ्यांनी शहरातील रुफटॉप हॉटेलचे सर्वेक्षण केले. त्यांनी शहरात सात हॉटेल्स असल्याचे कळवले आहे. मात्र, आणखी रुफटॉप असण्याची शक्यता आहे. त्यामुळे हे सर्वेक्षण परत करण्यात येईल.”
– तृप्ती सांडभोर, अतिरिक्त आयुक्त.