Pimpri Chinchwad – पिंपरी-चिंचवड शहरातील स्थावर मालमत्ता व्यवहारांमध्ये मोठी वाढ झाल्याचे चित्र समोर आले आहे. मुद्रांक शुल्क माध्यमातून शासनाला मिळणाऱ्या महसुलात यावर्षी लक्षणीय वाढ झाली आहे. त्यामधून महापालिकेला मिळणाऱ्या एक टक्का महसूलातून पालिकेच्या तिजोरीत चांगली भर पडली आहे. मुद्रांक शुल्कातून २२० कोटी रुपयांच्या तुलनेत तब्बल ४४३ कोटी २१ लाख रुपये जमा झाले आहेत. म्हणजेच मुद्रांक शुल्कातून मिळणारे उत्पन्न जवळपास दुप्पट झाले आहे. या वाढत्या महसुलामुळे शहरातील घरखरेदीची वाढती मागणी स्पष्ट होत असून, रिअल इस्टेट क्षेत्रासाठी हे अत्यंत सकारात्मक संकेत मानले जात आहेत. गेल्या काही वर्षांत पिंपरी-चिंचवड शहर झपाट्याने विकसित होत आहे. आयटी क्षेत्रातील वाढ, औद्योगिक क्षेत्राचा विस्तार आणि शहरातील वाढती पायाभूत सुविधा यामुळे या शहरात राहण्यासाठी अनेक जणांचा कल वाढत आहे. परिणामी घरांच्या खरेदी-विक्री व्यवहारात वाढ होत असून त्याचा थेट परिणाम मुद्रांक शुल्काच्या उत्पन्नावर दिसून येत आहे. विशेष म्हणजे पिंपरी-चिंचवड परिसरात मेट्रो, नवीन रस्ते, उड्डाणपूल, तसेच विविध विकास प्रकल्पांमुळे शहराची कनेक्टिव्हिटी अधिक मजबूत झाली आहे. त्यामुळे शहरात राहण्यास अनुकूल वातावरण तयार झाले आहे. याचा फायदा गृहनिर्माण क्षेत्राला होत असून अनेक नवीन गृहनिर्माण प्रकल्प उभे राहत आहेत. शहरातील मोशी, चिखली, तळवडे, रावेत, वाकड, पिंपळे सौदागर, चिंचवड, निगडी या परिसरात मोठ्या प्रमाणात निवासी प्रकल्प विकसित होत आहेत. मुद्रांक शुल्क महसूल दरम्यान, गृहखरेदीसाठी ग्राहकांमध्ये सकारात्मक वातावरण निर्माण झाले आहे. विशेषतः मध्यमवर्गीय आणि आयटी क्षेत्रातील तरुण वर्ग स्वतःचे घर घेण्याकडे वळत असल्याचे दिसून येते. बँकांकडून मिळणारे गृहकर्ज, आकर्षक व्याजदर आणि विकसकांकडून देण्यात येणाऱ्या विविध सवलती यामुळे ग्राहक घर खरेदी करण्याचा निर्णय घेत आहेत. रिअल इस्टेट क्षेत्रातील तज्ज्ञांच्या मते, येत्या काही दिवसांत घरांच्या खरेदीमध्ये आणखी वाढ होण्याची शक्यता आहे. कारण पुढील काळात गुढीपाडवा आणि अक्षय तृतीया यांसारखे शुभ मुहूर्त येत आहेत. पारंपरिक पद्धतीनुसार या सणांच्या दिवशी घर, जमीन किंवा सोने खरेदी करणे शुभ मानले जाते. त्यामुळे या काळात मोठ्या प्रमाणावर मालमत्ता व्यवहार होण्याची शक्यता वर्तवली जात आहे. याच पार्श्वभूमीवर अनेक विकसकांनी आपल्या प्रकल्पांमध्ये विशेष सवलती जाहीर करण्यास सुरुवात केली आहे. काही ठिकाणी बुकिंगवर सवलत, मोफत पार्किंग, स्टॅम्प ड्युटीवरील ऑफर अशा योजना ग्राहकांना आकर्षित करण्यासाठी दिल्या जात आहेत. त्यामुळे ग्राहकांनाही घर खरेदीसाठी उत्तम संधी उपलब्ध होत आहे. आधुनिक निवासी शहर म्हणून ओळख शहराच्या झपाट्याने होत असलेल्या विकासामुळे पिंपरी-चिंचवड हे केवळ औद्योगिक शहर न राहता एक आधुनिक निवासी शहर म्हणूनही उदयास येत आहे. त्यामुळे येत्या काळात गृहखरेदी व्यवहारांमध्ये आणखी वाढ होण्याची शक्यता असून, त्याचा परिणाम शासनाच्या महसुलातही सकारात्मक स्वरूपात दिसून येईल. एकूणच, मुद्रांक शुल्कातून झालेली ४४३.२१ कोटी रुपयांची कमाई ही पिंपरी-चिंचवड शहरातील वाढत्या गृहखरेदीचे आणि रिअल इस्टेट क्षेत्रातील सकारात्मक वातावरणाचे द्योतक मानली जात आहे. त्यामुळे शहराच्या आर्थिक घडामोडींना नवी चालना मिळत असल्याचे स्पष्ट होत आहे. पुढील महिन्यात रेडीरेकनरचे दर वाढणार असल्याने काही प्रमाणात दर वाढतील. मात्र, आता जुन्या दरानेच विक्री सुरू आहे. त्यामुळे मार्च अखेरपर्यंत गृह खरेदी करण्याकडे कल वाढला आहे. गुढीपाढव्याच्या दिवशी जास्त प्रमाणात नागरिक बुकिंग करतील. नागरिकांचा प्रतिसाद देखील चांगला आहे. – वसंत काटे, व्यवस्थापकीय संचालक, यशदा रिअल्टी ग्रुप.
