Crime News : जुन्नर तालुक्यातील पिंपळवंडी येथे अल्पवयीन मुलीचा निर्घृण खून करून तिच्यावर लैंगिक अत्याचार केल्याच्या धक्कादायक प्रकरणाच्या तपासासाठी विशेष तपास पथकाची (एसआयटी) स्थापना करण्यात आली आहे. पुणे ग्रामीण पोलीस अधीक्षक संदीपसिंह गिल यांनी ही माहिती दिली. त्यामुळे या गंभीर प्रकरणाच्या तपासाला आता वेग येणार आहे.

या प्रकरणी आळेफाटा पोलिसांनी गुन्हा दाखल करून संशयित आरोपीला अटक केली आहे. पोलिसांनी आरोपी साहिल खैरेची चौकशी केली असता त्याने गुन्ह्याची कबुली दिल्याची माहिती पोलिसांनी दिली आहे. घटनेनंतर परिसरात संतापाचे वातावरण निर्माण झाले असून, आरोपीविरोधात कठोर कारवाई करण्याची मागणी होत आहे.

प्रकरणाचे गांभीर्य लक्षात घेऊन पुणे ग्रामीण पोलिसांकडून एसआयटी स्थापन करण्यात आली आहे. या पथकामध्ये पुणे ग्रामीण अपर पोलीस अधीक्षक, उपविभागीय पोलीस अधिकारी तसेच आळेफाटा पोलीस ठाण्याचे वरिष्ठ पोलीस निरीक्षक यांचा समावेश करण्यात आला आहे. एसआयटीकडून घटनास्थळ, उपलब्ध पुरावे, साक्षीदारांचे जबाब आणि इतर तांत्रिक बाबींच्या आधारे तपास करण्यात येणार आहे.

तपासामध्ये कोणतीही त्रुटी राहू नये आणि प्रकरण न्यायालयात भक्कमपणे सिद्ध करता यावे, यासाठी पोलिसांकडून पुरावे संकलित करण्यावर विशेष भर दिला जात आहे. आरोपीविरोधातील तपास पूर्ण करून घटना घडल्याचा १५ दिवसांत न्यायालयात दोषारोपपत्र दाखल करण्यात येणार असल्याची माहिती पोलिसांनी दिली.

अल्पवयीन मुलीवरील अत्याचार आणि त्यानंतर झालेल्या खुनामुळे या घटनेने जिल्ह्यात खळबळ उडाली आहे. एसआयटीच्या तपासामुळे प्रकरणातील सर्व बाबी स्पष्ट होऊन आरोपीला कठोर शिक्षा मिळण्यासाठी तपास यंत्रणा प्रयत्नशील आहे.