phaltan case: फलटण ग्रामीण रुग्णालयातील डॉक्टर युवतीच्या आत्महत्या प्रकरणात एक मोठा खुलासा होत असून संशयित आरोपी पीएसआय गोपाल बदने याने आपला मोबाइल गायब केला आहे. त्या मोबाईल मधील डाटा काढण्यासाठी पोलिसांना अडचण येत असून तो मोबाइल लपविला, गायब केला का या मोबाईल प्रकरणात पोलिसच सहभागी झाले आहेत का? असा प्रश्न उपस्थित होत आहे. दरम्यान बदनेवर गंभीर आरोप करण्यात येत असून बदने हा महिलांची छेड काढायचा आणि तक्रार केल्यास पैसे मागायचा असेही समोर येत आहे.

पीएसआय गोपाल बदने या डॉक्टर युवतीच्या मृत्यूप्रकरणात संशयित आरोपी म्हणून पुढे येताच त्याच्या कारनामांचा पंचनामा अनेकांनी पुढे आणला असून हा पोलिस अधिकारी होता का? पोलिस वेशातील गुंड?अशी भावना सर्वसामान्य जनतेतून उमटली आहे. डॉक्टर तरूणीच्या आत्महत्या प्रकरणातील आरोपी पोलिस उपनिरीक्षक गोपाळ बदने महिलांची छेड काढायचा, डोळा मारायचा, तक्रार केल्यास पैसे मागायचा असे गंभीर आरोप होवू लागले आहेत.

फलटण उपजिल्हा रुग्णालयातील डॉक्टर तरूणीने एका हॉटेलमध्ये गळफास घेऊन आत्महत्या केली. ही घटना गुरुवारी ( दि. 23ऑक्टोबर) रात्री साडेदहाच्या सुमारास घडली. या घटनेने संपूर्ण महाराष्ट्र हादरला आहे. आत्महत्येपूर्वी डॉक्टर तरूणीने स्वतःच्या हातावर ‘माझ्या मरण्याचे कारण पोलिस उपनिरीक्षक गोपाल बदने असून, ज्याने चारवेळा माझ्यावर अत्याचार केला, तसेच प्रशांत बनकर याने चार महिने शारीरिक व मानसिक छळ केला,’ असे लिहून ठेवले आहे. याप्रकरणी फलटण शहर पोलिस ठाण्यात पोलिस उपनिरीक्षक गोपाल बदने आणि प्रशांत बनकर यांना अटक केली असून मानसिक व शारीरिक त्रास, तसेच लैंगिक अत्याचार गुन्हा दाखल झाला आहे.

बदनेच्या कारनाम्यांची चर्चा बाहेर

दरम्यान या प्रकरणात आरोपी असलेल्या पोलिस उपनिरीक्षक गोपाल बदनेबाबत काही धक्कादायक माहिती समोर आली आहे. फलटणच्या उपजिल्हा रुग्णालयात आलेल्या रुग्णांच्या नातेवाईकांकडून पोलीस उपनिरिक्षक गोपाळ बदनेवर गंभीर आरोप करण्यात आले आहेत. गोपाळ बदने हा महिलांची छेड काढायचा आणि तक्रार केल्यास पैसे मागायचा असं रुग्णांची नातेवाईक असलेल्या एका महिलेने म्हटलं आहे. या महिलेने गोपाळ बदनेवर आरोप करताना सांगितले की माझी भाची होती तिला डोळे मारले. ही घटना पंधरा दिवसापूर्वी घडली आहे. माझी भाची त्याच्याकडे तक्रार देण्यासाठी गेली होती. तिच्या नवर्‍या देखत तिला डोळा मारला. तक्रारीसाठी पैसे दिले नाहीत म्हणून पाच हजार रुपये द्या म्हणाला दिले नाहीत म्हणून त्याने दार लावून घेतलं.

कारवाई होणार की वाचवणार ?

गोपाल बदनेसह अटकेत असलेल्या प्रशांत बनकर आणि मृत डॉक्टर युवतीबाबत घटनेनंतर अनेक खुलासे समोर येत आहेत. ज्या यंत्रणांनी कारवाई करावी अशी जनतची अपेक्षा आहे त्याच यंत्रणा युवतीच्या मृत्यूनंतर वेगवेगळी माहिती समोर आणत आहेत. सोशल मिडीयावर याबाबत अनेकविध चर्चा व माहिती समोर येत असल्याने या प्रकरणात पोलीस यंत्रणा सत्यापर्यंत पोहोचणार आहे की नाही याबाबत सांशकता व संताप व्यक्त होत आहे. एका जीवाचा बळी गेल्यानंतर न्याय देण्याची भूमिका घेणे गरजेचे असल्याची भावना सामाजिक कार्यकर्ते व जनतेतून व्यक्त होत आहे.