कोरेगाव – विकासकामांना आमचा विरोध नाही. मात्र, त्यांच्या आडून गैरप्रकार घडत असतील, तर ते खपवून घेतले जाणार नाहीत. जनतेशी निगडित असलेल्या नगरपंचायतीच्या विषयांवर राष्ट्रवादी काँग्रेस शरद पवार गटाच्या सामाजिक न्याय विभागाचे जिल्हाध्यक्ष रमेश उबाळे यांनी ठिय्या आंदोलन सुरू केले आहे. याबाबत प्रशासनाने न्याय न दिल्यास लवकरच उच्च न्यायालयात जनहित याचिका दाखल केली जाईल, असा इशारा आमदार शशिकांत शिंदे यांनी दिला.

कोरेगाव नगरपंचायतीतील गैरव्यवहाराची चौकशी करून, दोषी असणार्‍यांना निलंबित करण्याच्या मागणीसाठी उबाळे यांनी तहसील कार्यालयासमोर ठिय्या आंदोलन सुरू केले आहे. आमदार शशिकांत शिंदे यांनी आंदोलनाच्या दुसर्‍या दिवशी मंगळवारी (दि. 16) भेट देऊन या आंदोलनास पाठिंबा दिला.

नगरपंचायतीत झालेल्या गैरव्यवहारांबाबत त्यांनी उबाळे यांच्याकडून माहिती घेतली. राष्ट्रवादी काँग्रेस शरद पवार गटाचे नगरसेवक हेमंत बर्गे, प्रीतम बर्गे, गणेश धनावडे, शिवसेनेचे उपजिल्हाप्रमुख दिनेश बर्गे, राष्ट्रवादीचे नेते किशोर नानासाहेब बर्गे, दिनेश सणस, डॉ. गणेश होळ, पदाधिकारी व कार्यकर्ते उपस्थित होते.

पत्रकारांशी बोलताना आमदार शिंदे यांनी नगरपंचायतीच्या गैरकारभारावर जोरदार टीका केली. या विषयी विधिमंडळाच्या अधिवेशनात प्रश्न उपस्थित केल्याचे त्यांनी निदर्शनास आणून दिले. राज्य सरकारने थातूरमातूर उत्तर दिले आहे. दुसरीकडे विकासकामांच्या आडून अधिकारी चुकीचे मार्ग अवलंबत आहेत. त्यातून दुसर्‍याच गोष्टी साध्य केल्या जात असल्याचा आरोप त्यांनी केला. या विषयी जिल्हा प्रशासनाने न्याय द्यावा. त्यांनी न्याय न दिल्यास मुंबई उच्च न्यायालयात लवकरच जनहित याचिका दाखल करणार आहे. नगरपंचायतीत राष्ट्रवादीच्या नगरसेवकांबाबत दुजाभाव केला जात असून, विकासकामांसाठी निधी दिला जात नसल्याचा आरोप त्यांनी केला.