Pune | पुणे जिल्हा मध्यवर्ती बँकेकडे २२ कोटी रुपयांच्या जुन्या नोटा असल्याची बातमी काही दिवासांपूर्वी आली होती. या जुन्या नोटांना ठेवायला जागा नसल्याचे कारण सांगत बँकेने नोटा स्विकारल्या नाहीत. यावर आता जिल्हा मध्यवर्ती बँकेचे अध्यक्ष दिंगबर दुर्गाडे यांनी प्रतिक्रिया दिली आहे. जवळपास 22 कोटी रुपयांच्या जुन्या नोटा पुणे जिल्हा बँकेकडे आहेत. जुन्या नोटा ठेवायला जागा नाही असं सांगून रिझर्व बँकेने या नोटा स्वीकारल्या नाहीत. यामध्ये बँकेचे मोठे नुकसान होत आहे, या विरोधात आम्ही सुप्रीम कोर्टामध्ये केस दाखल केली असल्याची माहिती दुर्गाडे यांनी दिली. सुप्रीम कोर्टामध्ये आम्ही रीट याचिका दाखल केली आहे यावर सुनावणी सुरू आहे. आमच्याकडे शिल्लक असलेली रक्कम ही व्हॅलीड रक्कम आहे ती स्वीकारली गेली पाहिजे, अशी मागणी दुर्गाडे यांनी केली आहे. केंद्र सरकार रिझर्व बँकेला आमच्या नोटा स्वीकारण्याचा आदेश देईल असा आम्हाला विश्वास असल्याचे त्यांनी सांगितले. तसेच गृहमंत्री अमित शहा व अर्थमंत्री निर्मला सीतारामन यांना देखील आम्ही याबाबत पत्र दिले असल्याचे त्यांनी सांगितले.
