PCMC News – पिंपरी-चिंचवड महापालिकेच्या वतीने पिंपरी येथील मिलिटरी डेअरी फार्म येथे पुणे-लोणावळा लोहमार्गावर उड्डाण पूल बांधण्याचे काम कासव गतीने सुरू आहे. संरक्षण विभाग, रेल्वे विभागाच्या परवानग्या मिळण्यास दिरंगाई झाली असून, ठेकेदारांकडूनही काम मुदतीत पूर्ण केले जात नसल्याने स्थापत्य विभागाने त्या ठेकेदारावर कारवाईचा बडगा उगारला आहे.

कामाच्या भाववाढीचा निर्देशांक गोठवून, ठेकेदाराला दिवसाला एक हजार रुपये दंड आकारण्यात येणार आहे. या विलंबामुळे पूल वाहतुकीस नोव्हेंबर महिन्यात खुला होण्याची शक्यता आहे. पुलाचे काम करणाऱ्या टी ॲण्ड टी इन्फ्रा. लि. या ठेकेदार कंपनीवर कारवाई करण्यात आली आहे. पिपरी कॅम्प, पिंपरी गाव, पिंपळे सौदागर, रहाटणी या भागास जोडण्यासाठी हा उड्डाण पुल संरक्षण विभागाच्या जागेत उभारण्यात येत आहे.

त्यामुळे पुणे-लोणावळा लोहमार्गाच्या क्रॉसिंगवर थांबण्याची गरज राहणार नाही. या उड्डाण पुलावर पुणे-मुंबई जुन्या महामार्गाकडून वाहनांची ये-जा सुलभ व्हावी म्हणून ग्रेडसेपरेटर मार्गाखाली तसेच, मेट्रोच्या मार्गाखाली भुयारी मार्ग बांधण्याचे महापालिकेचे नियोजन आहे. उड्डाण पुलाचे काम नेव्हेंबर २०२६ पर्यंत संपणार असले तरी, भुयारी मार्गाबाबत प्रत्यक्ष काहीच काम सुरू झालेले नाही.

त्या कामासाठी सल्लागार नेमण्यात आला आहे. परिणामी, उड्डाण पुलावरून वाहतूक सुरू झाल्यानंतर ग्रेडसेपरेटर मार्गावर तसेच, सर्व्हिस सत्यावर खोदकाम केल्याने वाहनचालकांना वाहतूक कोंडीचा सामना कराव लागणार आहे. महामेट्रोकडून भुयारी मार्गास नुकतीच परवानगी मिळाल्याने कामास विलंब झाल्याचे अधिकाऱ्यांनी सांगितले.

“तीन वेळा मुदतवाढ देऊनही ठेकेदार टी ॲण्ड टी इन्फ्रा. लि कंपनीने काम पूर्ण केले नाही. एक ऑगस्टपासून भाववाढीचा निर्देशांक गोठवण्यात आला आहे. तर, एक सप्टेंबरपासून प्रत्येक दिवसाला १ हजार रुपये दंड केला जाणार आहे. तो दंड त्यांच्या बिलातून वजा केला जाणार आहे.”
– विजय भोजने, कार्यकारी अभियंता.