PCMC News – जून महिना अर्धा संपत आला असून केव्‍हाही पावसाळ्याला सुरुवात होऊ शकते. पावसाळापूर्व नालेसफाईची कामे ९८ टक्‍के पूर्ण झाल्‍याचा दावा पालिकेच्‍या वतीने करण्यात आला आहे. परंतु शहरातील नाल्‍यांची परिस्थिती पाहता नालेसफाई केवळ कागदावरच झाल्‍याची दिसून येत आहे. शहरातील नाल्यांमध्ये गाळ, कचरा, प्लॅस्टिक तसेच असून पालिकेच्‍या नालेसफाईच्‍या दाव्‍यांची पोलखोल करत आहेत.

कचऱ्याने तुंडूंब भरलेले नाले पाहता पावसाळ्यात नाल्‍यांमध्ये पाणी तुंबून नागरिकांच्या घरात पाणी शिरण्याची शक्यता आहे. महापालिका प्रशासनाने नालेसफाईसाठी वेळापत्रक तयार केले होते. सुरूवातीला १५ मेपर्यंत शहरातील सर्व नाले सफाई पूर्ण करणे आवश्‍यक होते. मात्र त्यानंतरही काम पूर्ण न झाल्याने प्रशासनाने ३१ मे ही शेवटची तारीख ठरवली. मात्र ३१ मे पर्यंत असलेल्या मुदतीमध्ये देखील नालेसफाई पूर्ण करण्यात प्रशासनाला अपयश आले.

आता जून महिना अर्धा संपत आला असतानाही शहरात नालेसफाई पूर्ण झाले नसल्याचे ‘दैनिक प्रभातच्या’ प्रतिनिधीने केलेल्या पाहणीत समोर आले आहे. शहरातील भोसरी, कासारवाडी, आकुर्डी, फुलेनगर, लालटोपीनगर या भागातील नाल्यांमध्ये मोठ्या प्रमाणावर गाळ साचला आहे. या भागामध्ये झोपडपट्टी असून नाले तुंबल्यास त्याचे पाणी पात्राबाहेर येत नागरिकांच्या घरामध्ये शिरते. अशा परिस्थितीत नागरिकांना मोठ्या पूरस्थितीचा सामना करावा लागतो.

पूरस्थिती ओढवू नये यासाठी पावसाळापूर्व कामे करत नालेसफाई केली जाते. मात्र, आरोग्य विभागातील निष्क्रिय अधिकाऱ्यांच्या कारभारामुळे शहरातील नालेसफाई कागदावर आहे. त्यामुळे नागरिकांना यंदा पावसाळ्यात पूरस्थितीचा सामना करावा लागणार आहे. यंदा एल निनोच्या प्रभावामुळे अद्याप मान्सून सकि्रय झाला नाही. गतवर्षी मे महिन्यातच पावसाला सुरूवात झाली होती. यंदा अद्याप पाऊस सूरू झाला नसतानाही शहरातील नालेसफाई पूर्ण करण्यात आली नाही. त्यामुळे नागरिकांनी नाराजी व्यक्त केली आहे.

शहरात १४१ नाले
महापालिकेच्या विविध क्षेत्रीय कार्यालयांमार्फत मार्च महिन्यापासून नाले सफाई मोहीम सुरू करण्यात आली होती. शहरातील एकूण १४१ नाले आणि ९४ हजार ९१३ मीटर लांबीच्या नाल्यांची साफसफाई हाती घेण्यात आली आहे. सुरुवातीला १६ मार्च रोजी केवळ ५.०४ टक्के प्रगती नोंदवली गेली होती. मात्र एप्रिल आणि मे महिन्यात कामांना गती देण्यात आल्याने २५ मेपर्यंत ८५.८४ टक्के काम पूर्ण झाले आणि १ जूनअखेर ही प्रगती ९२.३३ टक्क्यांवर पोहोचली आहे. तर आतापर्यंत ९८ टक्के नाले साफ झाल्याचा दावा करण्यात आला आहे.