PCMC News – पिंपरी-चिंचवड शहरात गेल्या काही महिन्यांपासून भटक्या कुत्र्यांचा सुळसुळाट मोठ्या प्रमाणात वाढला असून, त्यामुळे नागरिकांच्या सुरक्षेचा प्रश्न गंभीर बनला आहे. शहरातील विविध भागांत भटक्या कुत्र्यांच्या टोळ्या मुक्तपणे फिरताना दिसत असून, लहान मुले, महिला आणि ज्येष्ठ नागरिकांवर कुत्र्यांच्या हल्ल्यांच्या घटनांमध्ये वाढ झाल्याने नागरिकांमध्ये भीतीचे वातावरण निर्माण झाले आहे. या पार्श्वभूमीवर नगरसेवक संदीप वाघेरे यांनी महानगरपालिका प्रशासनाच्या कामकाजावर तीव्र नाराजी व्यक्त केली आहे. पशुवैद्यकीय अधिकारी डॉ. अरुण दगडे आणि प्रमोद बाबर यांच्यावर कारवाई करण्याची मागणी त्यांनी महापालिका आयुक्तांकडे ई-मेलद्वारे केली आहे. महापालिकेकडून दरवर्षी भटक्या कुत्र्यांच्या नसबंदी आणि लसीकरणासाठी लाखो रुपयांचा निधी खर्च केल्याचा दावा केला जातो. मात्र प्रत्यक्षात शहरात कुत्र्यांची संख्या कमी होण्याऐवजी वाढत असल्याचे नागरिकांचे म्हणणे आहे. अनेक सोसायट्या, गल्लीबोळ आणि सार्वजनिक उद्यानांमध्ये कुत्र्यांच्या टोळ्यांमुळे नागरिकांना मॉर्निंग वॉक करणेही कठीण झाले आहे. त्यामुळे महापालिकेच्या नसबंदी मोहिमेची प्रभावी अंमलबजावणी होत आहे का, असा सवाल नगरसेवक वाघेरे यांनी उपस्थित केला आहे. याबाबत बोलताना संदीप वाघेरे म्हणाले, “नागरिकांच्या सुरक्षेचा प्रश्न हा प्रशासनासाठी सर्वोच्च प्राधान्याचा असायला हवा. मात्र सध्या या गंभीर समस्येकडे दुर्लक्ष केले जात असल्याचे दिसत आहे. कुत्र्यांच्या हल्ल्यांमुळे जखमी होणाऱ्या नागरिकांच्या वेदना प्रशासनाने समजून घेत तातडीने ठोस उपाययोजना करणे गरजेचे आहे.” भटक्या कुत्र्यांच्या नसबंदी प्रक्रियेचे ऑडिट करून त्याची प्रभावी अंमलबजावणी करावी, आक्रमक कुत्र्यांसाठी स्वतंत्र निवारा केंद्रे उभारावीत तसेच ‘डॉग बाइट’च्या घटनांनंतर तातडीने वैद्यकीय मदत उपलब्ध करून द्यावी, अशा प्रमुख मागण्या त्यांनी मांडल्या. नागरिकांनीही या प्रश्नावर सक्रिय भूमिका घेत संबंधित पशुवैद्यकीय अधिकारी अरुण कुमार दगडे (९०४९१९०८१७ / ८७८८०७०६६५), पीसीएमसी हेल्पलाइन तसेच सारथी हेल्पलाइन क्रमांक ८८८८००६६६६ यांच्याशी संपर्क साधण्याचे आवाहन वाघेरे यांनी केले आहे.
