PCMC News – महापालिकेची आर्थिक परिस्थिती दयनीय झाली असून पालिकेच्या तिजोरीत खडखडाट झाला आहे. गेल्या चार वर्षांत महापालिकेत प्रशासकीय राजवटीमध्ये मोठ्या प्रमाणावर अनावश्यक कामांवर खर्च करण्यात आला. अनेक उत्सव घेत कोट्यवधी रुपयांचा खर्च केला आहे. यावरुन महापालिका आयुक्त श्रावण हर्डीकर यांनी अधिकाऱ्यांना फैलावर घेतले. बुधवारी (दि. ११) महापौर रवी लांडगे, सत्तारुढ पक्षनेते प्रशांत शितोळे यांच्या उपस्थितीत अंदाजपत्रकाबाबत आयुक्तांनी बैठक घेतली. त्यावेळी इव्हेंटगिरी करणे आपलं काम नाही असे म्हणत आयुक्त हर्डीकर यांनी महापालिकेची आर्थिक परिस्थिती विषद केली.महापालिकेमध्ये मार्च २०२२ पासून प्रशासकीय राजवट होती. सर्व कारभार हा अधिकाऱ्यांच्या हातात होता. या काळात अनावश्यक कामांवर मोठ्या प्रमाणावर खर्च करण्यात आला आहे. तत्कालीन आयुक्त शेखर सिंह व अतिरिक्त आयुक्त प्रदीप जांंभळे-पाटील यांनी शिक्षणाचा जल्लोष घेतला होता. तसेच अनेक महोत्सव राबवले जात आहेत. या कार्यक्रमांसाठी चार वर्षात कोट्यवधी रुपयांचा खर्च केला आहे. असे कार्यक्रम घेण्याची महापालिकेची जबाबदारी नसतानाही फक्त इव्हेंट कंपन्या जगविण्यासाठी प्रशासनाने हा आटापिटा केला. यासोबतच अनेक अनावश्यक व खर्चिक कामांमुळे महापालिकेची आर्थिक परिस्थिती बिघडली. परिणामी, आता अत्यावश्यक कामांवर खर्च करण्यासाठी देखील महापालिकेला विचार करावा लागत आहे. अंदाजपत्रकाच्या बैठकीमध्ये याच गोष्टींवर चर्चा सुरू असताना आयुक्त हर्डीकर यांनी प्रशासकीय राजवटीमध्ये झालेल्या उधळपट्टीवर बोट ठेवले. अधिकाऱ्यांनी अत्यावश्यक कामे करण्याचे सोडून इव्हेंट घेण्यात धन्यता मानली. त्यामुळे इव्हेंटगिरी करणे हे आपलं काम नसल्याचे सांगत आयुक्तांनी अधिकाऱ्यांना चांगलेच धारेवर धरले.
