PCMC News – पिंपरी चिंचवड महापालिकेच्या वतीने मोशी येथे छत्रपती संभाजी महाराज यांचा उंच पूर्णाकृती पुतळा उभारण्यात आला आहे. त्याठिकाणी स्थापत्य आणि विद्युतचे उर्वरित काम पूर्ण करण्यासाठी प्रशासनाने निविदाप्रक्रिया राबवली. मात्र, बाकी सर्व कामे ३० टक्के कमी दराने झाली असताना पुतळ्याचे काम करणाऱ्या ठेकेदाराने निविदा दराच्या एका टक्का देखील कमी दर दिला नाही. ठेकेदारांनी जादा दर सादर केले असतानाही प्रशासनाने मान्यता दिली. या दोन निविदा प्रक्रियांच्या ५० कोटींच्या कामांमध्ये रिंग करत सुमारे १५ कोटी रुपये स्वतःच्या खिशात घालण्याचा डाव आखला असल्याचा आरोप स्थायी समितीच्या बैठकीमध्ये बुधवारी (दि. ११) करण्यात आला. बैठकीच्या अध्यक्षस्थानी सभापती अभिषेक बारणे होते. या विषयावरुन स्थायी समितीमध्ये काहीकाळ गोंधळाचे वातावऱण झाले. प्रशासनाने छत्रपती संभाजी महाराज यांच्या पुतळ्यासाठी असेलल्या उर्वरित जागेमध्ये सुशोभिकरण आणि आर्टविषयक कामे करण्यासाठी टप्पा दोनमधील निविदा प्रक्रिया राबवली. या प्रक्रियेत दोन ठेकेदारांनी सहभाग घेतला. त्यापैकी मे. धनेश्वर कन्स्ट्रक्शन प्रा. लि. या ठेकेदाराने निविदा दराच्या एक टक्काही कमी दर सादर केला नाही. प्रशासनाने ३२ कोटी ३४ लाख ५६० रुपये दराची निविदा काढली होती. त्यामधून फक्त रॉयल्टी व मटेरियल टेस्टींग चार्जेस वगळून निविदा दराइतकाच ३२ कोटी ३३ लाख ७४ हजार ६९५ दर सादर केला. स्थायी समितीच्या विषपत्रामधील इतर निविदांमध्ये ठेकेदारांनी ३० टक्के कमी दर दिलेले असताना या ठेकेदाराने एक टक्काही कमी दर का दिला नाही? असा सवाल शिवसेनेच्या नगरसेविका व स्थायी समितीच्या सदस्या सुलभा उबाळे यांनी उपस्थित केला. पिंपरी चिंचवड महापालिका तसेच स्थापत्यविषयक कामे करण्यास कंपनी पात्र आहे. मात्र विद्युतची कामे करण्यास ठेकेदार पात्र कसा? असाही सवाल त्यांनी उपस्थित केला. छत्रपती संभाजी महाराज पुतळा परिसरामध्ये विद्युत रोषणाई व विद्युतविषयक कामे करण्यासाठी प्रशासनाने १८ कोटी ६६ लाख ९ हजार ९६५ रुपयांची निविदा काढली होती. या निविदेबाबतही स्थायी समितीत चर्चा झाली. यातील निविदा दर अधिक असून पात्र ठेकेदार देखील यापूर्वी काम करणारा आहे. हे स्मारक महत्त्वाचे असून ही प्रक्रिया पारदर्शक होणे आवश्यक असल्याचे मत काही सदस्यांनी मांडले. त्यामुळे दोन्ही कामांचे प्रस्ताव आठवडाभरासाठी तहकूब करण्यात आले. छत्रपती संभाजी महाराज हे अस्मितेचा विषय आहेत. हे काम उत्कृष्ट झाले पाहिजे. त्यामध्ये कोणताही गैरप्रकार होणार नाही, ही सर्वांची जबाबदारी आहे. यापैकी एका निविदा प्रक्रियेमध्ये दोनच ठेकेदार सहभागी झाले असून पूर्वी काम करणाऱ्या ठेकेदाराला हे काम मिळाले आहे. त्याने दिलेला दर अधिक आहे. तो कमी करून देणे आवश्यक होते. कामाची पाहणी केल्यानंतर व दर कमी करून दिल्यानंतर यावर निर्णय घेतला जावा, अशी मागणी बैठकीत केली. – सुलभा उबाळे, सदस्य, स्थायी समिती. या विषयाबाबत सदस्यांनी काही त्रुटी लक्षात आणून दिल्या आहेत. तसेच या कामाची पाहणी करून त्याठिकाणी आणखी नवीन काही संकल्पना सदस्यांना सुचवायच्या आहेत. त्यामुळे हा विषय आठवडाभर तहकूब केला आहे. आम्ही या कामाची त्या ठिकाणी जाऊन पाहणी करणार आहोत. – अभिषेक बारणे, सभापती, स्थायी समिती.
