PCMC News – पिंपरी चिंचवड महापालिकेमध्ये सत्ताधारी भाजपाने सभा कामकाजाचे ऑनलाइन प्रक्षेपण सुरू केले होते. मात्र, सत्ताधाऱ्यांच्या या निर्णयाने त्यांच्या पदाधिकाऱ्यांची चांगलीच जिरली आहे. त्यामुळे सभा कामकाजाचे ऑनलाइन प्रक्षेपण बंद करण्याचा निर्णय घेण्यात आला आहे. परिणामी, आज (सोमवारी, दिं. १५) होणाऱ्या सर्वसाधारण सभेचे ऑनलाइन प्रक्षेपण करण्यात येणार नाही.

महापालिकेत भाजपची सत्ता आली आहे. मार्च महिन्यामध्ये सत्ताधारी भाजपाने सभा कामकाजाचे ऑनलाइन प्रक्षेपण करण्याचा निर्णय घेतला. तशी मागणी विरोधी पक्षनेते भाऊसाहेब भोईर यांनी देखील केली होती. त्याची दखल घेऊन महापौर रवी लांडगे यांनी आयुक्तांना सभा कामकाजाचे थेट प्रेक्षपण करण्याचे आदेश दिले होते. या प्रक्षेपणाचा फायदा होण्यापेक्षा सत्ताधाऱ्यांना तोटाच अधिक झाला असल्याचे समोर आले आहे.

ऑनलाइन सभेमुळे अनेकदा सत्ताधारी भाजपचे पदाधिकारी अडचणीत सापडले होते. त्यामुळे महापौरांवर थेट दिलगिरी व्यक्त करण्याची वेळ आली होती. तर, सत्तारुढ पक्षनेते प्रशांत शितोळे हे भाजपच्या नगरसेवकांवर दादागिरी करत असल्याचे व्हिडिओ सोशल मिडीयावर व्हायरल झाले होते. तसेच वरिष्ठ नगरसेवकांना देखील पक्षनेते दमात घेत असल्याचे व्हिडिओ व्हायरल झाले. सभेच्या थेट प्रेक्षपणामुळे तसेच, नगरसेवकांच्या समर्थकांना नगरसेवक काय बोलले हे समजत होते. तर, कोणता नगरसेवक कोणत्या विषयावर काय भूमिका मांडत आहे.

हे ही संपूर्ण शहरासमोर येत होते. तसेच, सभा कामकाजात नगरसेवक किती सहभाग घेतो, हे नागरिकांसह मतदारांना कळत होते. काही नगरसेवक थेट प्रेक्षपणातील स्वतःचा स्वतंत्र व्हिडीओ तयार करून त्याचे रिल्स बनवून सोशल मीडियावर व्हायरल करत होते. त्याला नागरिकांचा मोठा प्रतिसाद मिळत होता. मात्र, थेट प्रक्षेपणाचा प्रकार सत्ताधाऱ्यांच्या अंगलट आला आहे. त्यामुळे सत्ताधाऱ्यांनी सभा कामकाज ऑनलाइन करण्याचा निर्णय मागे घेतला आहे. यापुढे सभा ऑनलाइन पाहता येणार नाही.

“मार्च महिन्यात अंदाजपत्रक सादर करण्यात येणार होते. त्यामुळे सर्वसाधारण सभच्या कामकाजाचे थेट प्रक्षेपण करण्यात आले. नियमित होणाऱ्या मासिक सर्वसाधारण सभेचे थेट प्रेक्षपण केले जाणार नाही. सोमवारी (दि. १५) होणाऱ्या सर्वसाधारण सभेचे ऑनलाइन प्रक्षेपण केले जाणार नाही.”
– प्रशांत शितोळे, सत्तारुढ पक्षनेते.

आजच्या सभेकडे शहराचे लक्ष
सोमवारी (दि. १५) महापालिकेची जून महिन्याची सर्वसाधारण सभा होणार आहे. या सभेमध्ये स्वीकृत नगरसेवकांची नियुक्ती यासह विकास आराखड्याच्या समितीसाठी सदस्यांची निवड, पुनावळे येथील आरक्षित जागा भाड्याने देणे असे महत्वाचे विषय आहेत. याव्यतिरिक्त ६० कोटी घोटाळ्यांबाबतचा कामांच्या चौकशीचा अहवाल, १०० कोटी रुपये कचरा विलगीकरणावर खर्च, पाणी, कचरा यासारखे मुद्दे गाजणार आहेत. त्यामुळे सभेकडे शहरवासियांचे लक्ष लागले आहे.