PCMC News – चार वर्षांच्या प्रशासकीय राजवटीनंतर महापालिकेत जानेवारी महिन्यापासून लोकप्रतिनिधींचा कारभार सुरू झाला आहे. चार वर्ष सत्तेपासून दूर असलेल्या नगरसेवकांना काय करू अन काय नाही अशी परिस्थिती झाली आहे. त्याचा परिणाम म्हणून समित्यांच्यामार्फत चक्क महापालिका अधिनियमच मोडीत काढत विविध ठराव केले जात आहेत. असाच एक ठराव विधी समितीने केला असून महापालिकेतील सर्व निविदांच्या अटी शर्तींना विधी समितीने मान्यता देण्याचा हट्ट धरला आहे. आज (सोमवारी, दि. २०) हा हट्ट सभागृहात पूर्ण होणार की यावर वादळी चर्चा होणार याकडे लक्ष लागले आहे. निविदा काढत असताना संबंधित विभागाच्या वतीने काढल्या जातात. त्यामध्ये अटी शर्ती तसेच निविदांबाबत काम प्रशासकीय पातळीवर पूर्ण केले जाते. त्यानंतर मान्यतेसाठी हे विषय स्थायी समितीकडे पाठविण्यात येतात. महापालिकेत स्थायी समिती ही महत्त्वाची समिती आहे. त्या समितीच्या मंजुरीनंतर प्रत्यक्ष काम करता येते. तसेच, मागणीनुसार निधी उपलब्ध होतो. निविदा प्रक्रिया (संग्रहित छायाचित्र) महापालिकेच्या तिजोरीच्या चाव्या या समितीकडे असल्याने ही समिती प्रमुख मानली जाते. तसेच, शिक्षण, शहर सुधारणा, विधी, महिला व बालकल्याण, क्रीडा आणि शिक्षण या विविध विषय समित्या आहेत. या विशेष समित्यांना काही अधिकार प्रदान करण्यात आले आहेत. त्यामध्ये महापालिकेच्या कायदा विभागातील धोरणांबाबत मार्गदर्शन करणे. त्यावर पाक्षिक बैठकीत चर्चा करून योग्य निर्णय घेणे, हे विधी समितीचे मुख्य अधिकार आहेत. मात्र, आता निविदांमध्ये भाग घेत दुकानदारी थाटण्याचा घाट विधी समितीचे अध्यक्ष व सदस्यांनी घातला आहे. कायदा विभागामार्फत महापालिकेतील विभागांना व त्यांच्याकडील फाईलींना (नस्ती) योग्य तो अभिप्राय दिला जातो, अशा सर्व फाईली विधी समितीमार्फत पाठवण्यात याव्यात. तसेच, महापालिकेतील सर्व निविदांच्या अटी व शर्ती या विधी समितीच्या मान्यतेसाठी पाठवण्याबाबत विधी समितीस अधिकार प्रदान करावे, असा ठराव विधी समितीने मंजुर केला आहे. तो प्रस्ताव मान्यतेसाठी सर्वसाधारण सभेसमोर ठेवण्यात आला आहे. ती सभा येत्या सोमवारी होणार आहे. सभेने विधी समितीच्या या प्रस्तावाला मान्यता दिल्यास स्थायी समिती तसेच, कायदा विभागाचे अधिकारी कमी होण्याची होण्याची शक्यता आहे. ते अधिकार प्राप्त झाल्यास विधी समिती महापालिकेतील सर्वाधिक महत्वाची समिती ठरणार आहे. तर यामाध्यमातून नवीन दुकानदारी सुरू होईल हे वेगळे नमूद करण्याची आवश्यकता नाही.
